O PSOE presentou este xoves no Rexistro da Deputación de Lugo unha declaración institucional en defensa do sector lácteo coa que busca a unanimidade da Corporación Provincial para “esixir ao Goberno Central un acordo de prezos mínimos do leite análogo ao do Executivo de Francia e, en caso de que a normativa vixente o impida, unha modificación da Lei”. Este é un dos principais acordos dos 10 en total que os socialistas reclaman na declaración institucional, e que recollen as reivindicacións da Plataforma en Defensa do Sector Lácteo integrada por gandeiros e sindicais. O PSOE pediu a Candia a convocatoria urxente dunha xunta de voceiros provinciais na que aprobar esta declaración institucional.
Así o adiantou este xoves Darío Campos Novo, voceiro provincial socialista, durante a tractorada en defensa do sector lácteo, que tivo lugar na capitalidade de Lugo. “É necesario a suma de esforzos de todos os grupos políticos, así como da cidadanía en xeral, para tentar solventar a dramática solución que está a vivir o sector lácteo. 5.000 familias lucenses viven directamente deste sector. A produción de leite é o motor da economía lucense. Se aos gandeiros lles vai mal, a Lugo tamén. É imprescindible a posta en marcha de todas aquelas iniciativas que contribúa a garantir a supervivencia das explotacións. O PSOE presentou no Pleno de xullo unha moción coas reivindicacións da Plataforma do Sector Lácteo que non contou co apoio do PP, aínda que Candia integrou á Deputación de Lugo na Plataforma. Pero dende entón a situación cambiou. Mentres en España se produciron reunións coa Ministra nas que non se chegou a ningún tipo de acordo, en Francia o Goberno ofreceu unha solución. Polo tanto, se o Executivo francés pode, ¿por que non o Goberno español?. Por este motivo, presentamos esta declaración institucional co fin de que todos os grupos políticos na Deputación de Lugo reclamemos unha solución para os nosos produtores de leite”.
Acordos propostos na declaración institucional
Tal e como recolle textualmente a declaración institucional presentada hoxe na Deputación de Lugo polo socialistas, as medidas en defensa do sector lácteo que o PSOE propón aprobar por unanimidade dos tres grupos políticos con representación no organismo provincial son as seguintes:
1.- O Goberno central debe chegar a un acordo de prezos mínimos da leite en orixe análogo ao Goberno Francés e, en caso de que a normativa vixente o impida, promover as modificacións lexislativas necesarias para acadalo, de xeito que o prezo mínimo garanta a cobertura dos prezos de producción referenciados a parámetros obxectivos.
2.- A Xunta de Galicia, como primeira Comunidade Autónoma produtora de leite en España, debe dar prioridade absoluta á situación do sector lácteo e liderar as xestións ante o Goberno Central para poñer fin á crise dun sector vital para Galicia e garantir o futuro do mesmo.
3.- A Xunta de Galicia debe habilitar os instrumentos legislativos e operativos para garantir a recollida de leite nas explotacións galegas a un prezo que garanta a viabilidade das mesmas.
4.- Xunta de Galicia e Goberno Central deben ejecutar un plan específico para a valoración real e colocación de excedentes da industria láctea a través de medidas como as compras públicas de intervención deses excedentes, almacenamento privado e entrega a terceiros países.
5.- Xunta de Galicia e Goberno Central teñen que facer as xestións necesarias para por na axenda europea de inmediato o problema do sector lácteo galego co impulso de medidas concretas que adapten a regulación do mercado europeo á realidade do sector produtivo galego e estatal.
6.- A Xunta de Galicia debe por en marcha unha campaña de estímulo do consumo de leite e derivados de procedencia galega a través de campañas de concienciación en diversos eidos públicos e privados.
7.- A Xunta de Galicia e o Goberno Central deben impulsar e garantir a actuación eficaz da Comisión de Competencia, para que execute de maneira inmediata e contundente as inspeccións e sancións contra as comercializadoras que utilizan o leite como un produto reclamo.
8.- Xunta de Galicia e Goberno Central han de habilitar de xeito inmediato unha Comisión de Valoración de contratos vixentes con capacidade resolutiva para anulalos se as condicións para o gandeiro non respetan parámetros de viabilidade, garantía de duración e recollida de leite.
9.- É fundamental que a Xunta de Galicia, de acordo co Goberno Central, desenvolvan de xeito inmediato, un plan galego de implantación de industria transformadora de derivados lácteos en Galicia que impulse a produción de produtos tradicionais que permita diversificar a producción das propias explotacións e tamén promova o asentamento de industrias transformadora de derivados lácteos de consumo masivo, vinculado a un plan de incremento das exportacións e penetración en mercados emerxentes.
10.- A Xunta de Galicia debe impulsar a figura das cooperativas como axentes aglutinadores de produtores, e facer as xestións necesarias para habilitar os instrumentos precisos para que as propias cooperativas teñan capacidade de negociación efectiva coa industria, sobre a comercialización de produción dos gandeiros asociados.