Alcoa San Cibrao únese á celebración do X Mes do Voluntario de Alcoa en todo o mundo cunha iniciativa dos seus traballadores voluntarios dirixida a ofrecer unha sesión de teatro terapéutico a persoas atendidas pola Asociación de Axuda ó Enfermo Mental A Mariña, que recibirá ademais 3.000 dólares de Fundación Alcoa como respaldo a esta iniciativa solidaria dos traballadores da compañía. A función celébrase o domingo, 4 de outubro, no pavillón de deportes de San Román de Vilaestrofe do municipio de Cervo.
Os voluntarios de Alcoa, que participarán na posta en escena da representación teatral, trasladarán tamén aos residentes do centro da Asociación en Cervo ata o lugar do teatro, asistirános durante a función teatral e levaranlles de volta á residencia unha vez concluída. A Asociación Mulleres As Espalladoras de San Román de Vilaestrofe colabora así mesmo no evento e a súa organización.
A obra “O Cazo de Sabela” que se representará foi expresamente adaptada pola Asociación de Axuda ó Enfermo Mental A Mariña para representarse como teatro grupal con obxectivos terapéuticos que estimulen a escoita, a confianza, a expresión e a empatía, para propiciar o achegamento á natureza e ó modo de percibir os diferentes.
Os voluntarios de Alcoa veñen colaborando desde fai anos coa Asociación de Axuda ó Enfermo Mental A Mariña, que recibiu ademais máis de 30.000 dólares de Fundación Alcoa en total. En anteriores ocasións, os traballadores da fábrica de San Cibrao axudaron a acondicionar a nova residencia da organización, mellorando os patios do centro de rehabilitación psicosocial e laboral, creando unha zona de compostaxe para o horto e construído un invernadoiro, e acondicionando o taller de carpintería do centro.
A Asociación de Axuda ao Enfermo Mental fundouse en 1999 por familias afectadas que uniron os seus esforzos co obxectivo común de conseguir que tanto as persoas afectadas como as súas familias conten cunha axuda e asistencia continuada, buscando a integración dos mesmos na sociedade e na vida da comunidade, e fixando como obxectivo prioritario a súa integración psicosocial e laboral. A Asociación conta con dous centros de rehabilitación, un en Burela e outro en Ribadeo; ademais dun piso protexido e unha residencia en Cervo.
Con esta actividade de apoio terapéutico ás persoas con enfermidade mental, Alcoa San Cibrao inicia o seu X Mes do Voluntariado, un periodo dedicado a crear diferenzas positivas na nosa comunidade, na que vivimos e traballamos.