O Concello de Mondoñedo agradécelle á Xunta os traballos de mellora para habilitar a ruta de sendeirismo dos Acivros no monte de Fragavella

Mondoñedo, 14 de decembro de 2015.- O Goberno local do Concello de Mondoñedo agradece a colaboración da administración autonómica, que vén de rematar os traballos de mellora para habilitar a ruta de sendeirismo dos Acivros no monte de Fragavella. A ruta orixinaria tiña un percorrido de 5.875 metros, mentres que a acondicionada pola Xunta este ano ascende ata os 11.800 metros.

Tal e como explica a alcaldesa, a popular Elena Candia, o obxectivo do Concello e da Xunta foi o de acondicionar unha ruta de sendeirismo que favoreza o acceso ao público a esta finca de propiedade pública na que se poden observar algúns dos ecosistemas máis característicos da Serra do Xistral.

As obras de acondicionamento da ruta deron comezo a mediados de agosto e veñen de rematar. O custo dos traballos executados ascendeu a 13.153 euros e contaron co financiamento da Consellería de Medio Ambiente e Ordenación do Territorio.

A actuación incluíu o desbroce da zona, o acondicionamento dos sendeiros, a instalación de catro pontes de madeira, así como a sinalización do percorrido no que tamén se inclúe información de interese sobre a ruta. Completáronse os traballos co arranxo da fonte Fresca e a mellora dos accesos ao aparcamento.

A rexedora subliña o remate duns traballos que posibilitarán que os veciños, veciñas e visitantes “conten cun reclamo máis para desfrutar e profundar en todos os recursos que ten a nosa localidade”. Elena Candia comprométese a seguir recuperando espazos verdes e naturais esquecidos durante anos polo anterior Goberno.
A alcaldesa lembra que situar Mondoñedo como destino verde se atopaba dentro das estratexias de posicionamento turístico do Concello.