O Grupo Municipal do PP de Lourenzá lamenta que o Goberno local se limite a desprezar a labor de oposición en vez de gobernar

Lourenzá, 22 de marzo de 2016.- A voceira do Grupo Municipal do Partido Popular de Lourenzá, Emma Álvarez Chao, lamenta que o Goberno socialista da localidade se limite a desprezar a labor de oposición en vez de Gobernar. “Levamos dez meses de parálise absoluta, no que nin cumpren coas promesas electorais, nin cos acordos plenarios” ademais de ter unha actitude de “humillación” cara os que “estamos a trasladar as demandas dos veciños e cumprimos coa función que nos foi encomendada”.

A actitude que ten cara aos grupos da oposición suscita queixas “non só entre os populares” senón tamén no Grupo Municipal do BNG que mesmo na última sesión plenaria se abstivo en todos os puntos en sinal de protesta. Emma Álvarez Chao pídelles que Gobernen, xa que recortar a partida para emprego nos orzamentos de 2016 e xogar cos postos de traballo “non é o que lles piden os veciños”.

Ademais, “recorren ás mentiras para cubrir a realidade”, di a voceira dos populares, en referencia a que “se nos abstivemos na comisión informativa e votamos en contra aos orzamentos no pleno é porque non dispoñíamos nun primeiro momento da información suficiente” pero o que “está claro, é que non poderíamos ser cómplices dunhas contas que mostran a falta de proxecto dos socialistas”.

“Estase a dar unha situación que dende que son edil non vivimos no Concello de Lourenzá”, onde sempre, -engade a popular- se tratou con respecto á oposición e mesmo “demos máis explicacións e información que a que nos obrigaba a lei”. “Acaso como a alcaldesa nunca fixo oposición, considera que esta función está demais”, analiza Álvarez Chao, quen lamenta que non lle sexan contestadas as preguntas. “Trasladarémolas por escrito tal e como requiren agora, xa que cambiaron as regras de xogo na última sesión plenaria, non o fixeran antes. O noso proceder foi sempre o mesmo”, asegura.

Polo tanto, “a realidade é que a prepotencia cara os representantes públicos é un insulto aos veciños, insúltanos ao non atender aos rogos que lles trasladamos nos plenos, ao negarse a responder ás preguntas plenarias que facemos, ao deixar en saco roto o que prometeron, ao mofarse de representantes públicos…”, considera Álvarez Chao.