A delegación de Xuventude do Concello de Foz orienta para inscribirse nos campamentos que oferta a Xunta para moz@s de 9 a 17 anos

Foz, 11 de abril de 2016. A Delegación de Xuventude do Concello de Foz, que dirixe Mercedes González Alonso, orienta na inscrición para os campamentos que oferta a Xunta de Galicia para mozos e mozas de 9 a 17 anos. Os interesados poden dirixirse á Casa da Xuventude ou chamar ao teléfono 982 13 30 37.

O departamento municipal de Xuventude no Concello focense explica que “os mozos e mozas de entre 9 e 17 anos poden solicitar ata o 23 de abril prazas nos diferentes campamentos que oferta a Xunta de Galicia. A participación na oferta da campaña de verán 2016 realizarase mediante a inscrición individual ou múltiple (para os supostos de dous, tres ou catro irmáns ou irmás). As persoas participantes disporán dos seguintes servizos: a) un programa de actividades de carácter sociocultural, recreativo, formativo e convivencial, que posibilite a participación das mozas e mozos; b) aloxamento nun albergue xuvenil, nunha residencia xuvenil ou nun campamento xuvenil; c) manutención en réxime de pensión completa; d) o material necesario para a actividade; e) un equipo técnico de persoal especializado en animación sociocultural e actividades de tempo libre e actividades náuticas, de ser o caso. Así mesmo, e para o caso das persoas con necesidades especiais por razón da súa discapacidade, disporase de persoal de apoio que conte con formación e experiencia para atender as súas necesidades; f) atención sanitaria de primeiros auxilios e seguro de accidentes; g) nas actividades desenvolvidas noutras comunidades autónomas inclúese o transporte desde Santiago de Compostela, ou desde o lugar que se sinale como punto de saída, ata o lugar de destino, así como o retorno ata Santiago de Compostela. Para obter máis información poden visitar o portal de Xuventude: xuventude.xunta.es”.