Celebrado o VI Encontro Provincial de Cooperación e Asistencia aos Concellos

Lugo, 18 de abril de 2016.- O vicepresidente e responsable da Área de Cooperación e Asistencia aos Concellos da Deputación, o nacionalista Antonio Veiga, xunto co Deputado- Delegado da Área de Promoción Económica e social da Deputación, Álvaro Santos e a Profesora de dereito administrativo da Universidade de Santiago de Compostela e coordinadora do Encontro, Alba Nogueira, participaron na apertura do VI Encontro Provincial de Cooperación e Asistencia aos Concellos, que se celebrou durante toda a xornada no Salón de Actos da Deputación de Lugo.

Antonio Veiga resaltou durante a inauguración da xornada “a importancia da celebración do Encontro, pois abordamos cuestións que afectan a organización estrutural da administración local, como pode ser o modelo de xestión de servizos e a súa posible remunicipalización ou reinternalización, tamén se aborda unha temática tan importante, e máis na provincia de Lugo como é a xestión en materia de servizos sociais, e por último, pero non menos importante, unha temática que esta acaparando noticias nos medios de comunicación na actualidade, a planta local de Galicia na que se abordan cuestións coma se son precisos fusións de entes municipais ou cal debe ser o tamaño ideal dun concello”.

O VI Encontro contou con poñentes pertencentes as tres universidades galegas así coma da Universidade Autónoma de Madrid, a xornada comezou cunha mesa redonda sobre os servizos sociais en Galicia que contaba coa presenza do xerente do Colexio Oficial de Traballo Social de Galicia, Víctor González Meizoso, así como da Profesora de Dereito Administrativo da Universidade de Vigo, María Antonia Arias Martínez. Ás once da mañá, deu comezo un relatorio impartido por Francisco Velasco, profesor da Universidade Autónoma de Madrid, relacionado coa racionalización e reinternalización de servizos nos gobernos locais, a mañá finalizou cunha mesa redonda sobre a creación de empresas municipais así como da xestión de persoal para a prestación de servizos, que contou con Diana Santiago Iglesias e Javier Ferreira Fernández, profesores de dereito administrativo da Universidade de Santiago de Compostela. A tarde, Luís Villares Naveira, Maxistrado do Tribunal Superior de Xustiza de Galicia, realizou un relatorio sobre a Planta Local de Galicia, para posteriormente participar xunto a Luís Caramés Viéitez (Catedrático de Economía da USC) e Carlos Alberto Amoedo Souto (Profesor de Dereito Administrativo da Universidade da Coruña), nunha mesa redonda na que respostaron as preguntas formuladas polos asistentes acerca dunha reforma local para Galicia.

O VI Encontro de Cooperación e Asistencia aos Concellos foi clausurado polo Vicepresidente e Deputado- Delegado das Áreas de Cooperacióne Asistencia aos Concello e Deporte da Deputación de Lugo, Antonio Veiga, que cerrou o acto sinalando: “quero agradecer ás máis de 150 persoas que pasaron pola xornada a súa asistencia e participación na mesma, así como parabenizar a Coordinadora do Encontro, Alba Nogueira e a tódolos poñentes pola calidade e a claridade das súas intervencións e por axudar a por luz sobre cuestións de vital importancia para un mellor funcionamento das administracións locais de toda a provincia”.