Galiza Nova chama ao estudantado da Mariña a participar da Folga estudantil do vindeiro 13 de abril “en defensa do ensino público galego”

Galiza Nova, mocidades do BNG, desenvolveu durante as pasadas semanas na Mariña unha intensa campaña para espallar a Folga do vindeiro 13 de abril convocada por Erguer, organización unitaria do estudantado galego. O Secretario Xeral de Galiza Nova, Alberte Mera, que explicitou o apoio da mocidade do BNG á folga estudantil, afirmou que “esta non é só una mobilización contra os recortes do PP no ensino galego senón que tamén nos mobilizamos para derrubar definitivamente e toda a súa totalidade a LOMCE e impedir a aplicación do decreto 3+2”, que calificou de “ataque brutal contra o ensino público co que pretenden que a maioría do estudantado quede fora do ensino e pecharlle as portas da universidade”. Para Mera, “mentres no se derrogue totalmente a LOMCE e o 3+2 estaremos volvendo ao modelo educativo franquista, un retroceso de 50 anos co obxectivo de volver a un ensino máis españolizado e só para ricos.”

Segundo informan desde as mocidades nacionalistas, na Mariña realizáronse repartos do material e xuntanzas informativas cos estudantes dos diferentes centros. O responsábel comarcal, Martín Graña , indicou que “a campaña tivo unha extraordinaria acollida entre o estudantado e recabou o apoio de outros sectores da comunidade educativa, como o profesorado ou as nais e pais, afectados tamén por estas políticas de recortes.” Así mesmo, Graña informou dunha concentración convocada por Erguer para a propia xornada de folga diante do I.E.S. de Ribadeo as 11.00.

Desde Galiza Nova fan un chamamento á mocidade da Mariña a apoiar a Folga Estudantil do 13 de abril convocada polo estudantado galego e a acudir á concentración/manifestación porque, en palabras do Secretario Xeral da organización, “ou loitamos agora polo ensino público galego ou perderémolo para sempre, e só as elites poderán estudar.”