O Concello de Burela acondiciona un solar nas inmediacións da gardería infantil para aparcamento público

Burela, 12 de xullo de 2016. Nas últimas horas deron comezo as obras de acondicionamento duns terreos nas proximidades do Hospital da Costa, que o Concello lle cederá á empresa que realizará os traballos de ampliación dese centro.

O concelleiro de Obras, Ramiro Fernández Rey, explica que “o solar atópase nas inmediacións do colexio Vista Alegre e da gardería infantil polo que evidentemente, e máis aló do uso temporal para aparcamento do Hospital da Costa, vai a dar un gran servizo tanto aos colexios e institutos como os días de partido ou competicións nos pavillóns deportivos”.

O edil socialista sinalou que “eses terreos serán destinados a aparcamento público provisional nestes momentos mentres se fan as obras de ampliación do Hospital da Costa, e despois seguirá a ser aparcamento público do Concello de Burela, que será moi útil para desconxestionar toda aquela zona”.
Fernández Rey subliñou que “o equipo de goberno do Concello de Burela aposta claramente pola ampliación do Hospital da Costa e por darlle facilidades á empresa para que poida acometer as obras o antes posible e coa máxima comodidade para todos os veciños e veciñas do noso concello”.