O alcalde de Burela, satisfeito pola entrada en servizo do novo acceso ao porto

Burela, 1 de decembro de 2016. O alcalde, Alfredo Llano, mostrou a súa satisfacción pola entrada en servizo do novo acceso ao porto, unha obra que supuxo un investimento de máis de 8 millóns de euros. Este novo viario estará aberto ao tráfico a partir das cinco da tarde. O rexedor subliña que suporá un alivio para as principais arterias da vila, que a diario eran atravesadas por centos de camións procedentes ou con destino ao peirao. Ata Burela viaxou o presidente da Xunta, Alberto Núñez, para inaugurar esta infraestrutura.

Alfredo Llano declarou que “era unha obra moi agardada por todos os veciños e veciñas de Burela. Levábamos xa anos de espera e a obra agora mesmo vai cumprir unha función moi importante para o noso concello”.

O rexedor burelés lembrou que “houbo grandes dificultades de construción e houbo que facer moitas cousas polo medio que foron retrasando esta inauguración, e tamén foron acumulando cada vez máis o orzamento. É unha obra que rolda os 8.300.000 euros e iso dá lugar a pensar o gran investimento que houbo que facer para que fose unha realidade. Hai que darse conta que son 1.260 metros, é un percorrido curto, pero que vai ser de gran importancia para o noso concello”.

Llano salientou que “tanto as manifestacións do presidente da Xunta como as miñas foron que isto ven constituír un bo arranxo para solucionar unha serie de problemas derivados do transporte que ven saíndo da lonxa cara a diversos mercados que hai. Antes tiñan que cruzar todos os camións que saen do porto que son moitos, unha media de case 400 ao día, o centro do pobo e agora grazas a este novo acceso xa se incorporan directamente á N-642. Gañamos en seguridade e medio ambiente, polo tanto isto ven arranxar moitos problemas neste senso, os veciños van notalo e imos estar todos máis contentos nese aspecto”.

O alcalde dixo: “hai que salientar que non soamente se fai o acceso ao porto comercial onde cargan e descargan o peixe, senón que vai dar a facilidade de que moitos visitantes poidan acceder á nosa vila a través desa vía e conectar coa avenida da Mariña, as rúas Castelao, Curros Enríquez, Pascual Veiga e Rosalía de Castro, e estarán no centro de Burela de xeito inmediato. Tamén outra cousa que me parece moi importante é que ese acceso lle vai dar cobertura ao polígono industrial do Berbés, que agora mesmo está pouco desenvolvido, pero pode ser un aliciente para o seu desenrolo. Esta obra ven completar outra forma de acceder á vila ou visitar o porto, o barco museo e as praias”.

Alfredo Llano engadiu: “estamos contentos, foi unha obra moi agardada e por fin se culminou, e agora que sexamos todos capaces de aproveitala da mellor maneira posible, que nos comprometamos todos a sacarlle rendemento tanto no plano económico como no social e cultural, incluso no turístico”.

Aproveitando a viaxe do presidente da Xunta, Alberto Núñez Feijóo, a Burela o rexedor falou con el de asuntos como a nova Edar e a nova escola infantil. É obxectivo e intención do alcalde solicitar un encontro co titular do executivo galego en Santiago para abordar temas de interese para Burela e para a comarca.