O grupo Xógara ofrece este luns un concerto en Ribadeo. Será no parque de San Francisco ás 22:30 horas. E no Forte de San Damián pode visitarse, ata o 26 de agosto, unha exposición de fotografías de Ruth Matilda Anderson

Ribadeo, 31 de xullo de 2017. O grupo Xógara ofrecerá un concerto esta noite en Ribadeo. A actividade enmárcase na programa cultural do Concello para este verán. En caso de choiva esta actuación trasladarase ao Cine Teatro. Ademais no forte de San Damián, ata o 26 de agosto, pódese visitar a exposición de fotografía de Ruth Matilda Anderson.
O concelleiro de Cultura, Farruco Graña, dixo que “segue o verán en Ribadeo, en toda a comarca da Mariña, e seguen as actividades culturais, en concreto no concello de Ribadeo seguimos apostando forte pola cultura”.
O edil nacionalista lembrou que “esta fin de semana tivemos ocasión de inaugurar a exposición de Ruth Matilda Anderson. Foi todo un éxito a presentación. Animamos a todas as persoas, como sempre, a dar un paseo que é moi saudable e despois, tamén para o espírito é moi saudable pararse no forte de San Damián e contemplar as excelentes fotografías de Ruth Matilda Anderson”.
Graña indicou que “temos un misterio que resolver. Hai un cabazo que está nunha das parroquias de Ribadeo, que a ver se entre todos somos quen de identificar e logramos saber de qué casa é ese cabazo que aparece nas fotografías de Ruth Matilda Anderson”.
O concelleiro ribadense engadiu que “hoxe luns, último día do mes de xullo, despois de facer ese paseo saudable e de visitar a exposición de Ruth Matilda Anderson, poderemos achegarnos ao parque de San Francisco ás dez e media, para escoitar un concerto moi singular. É o grupo Xógara, composto por persoas de Gales, de Inglaterra e tamén por un veciño noso da Mariña luguesa, un veciño de Foz que está pola Gran Bretaña facendo a súa vida, compoñendo e traballando”.
Graña manifestou que “este grupo ten un repertorio moi diverso. Poderemos escoitar pezas en galego de músicos ingleses, pezas en galés e distintos ritmos. Como sempre se o tempo o impide o concerto será no Teatro”.