Fernando Suárez requírelle de novo ao presidente da Xunta apoio para definir os incumprimentos da lei de incendios en Ribadeo. O 31 de maio remata o período voluntario para que os propietarios desbrocen as súas fincas deixando unhas faixas de protección de 50 metros arredor das casas e dos núcleos rurais

Ribadeo, 9 de abril de 2018. O alcalde, Fernando Suárez, ven de mandarlle un escrito ao presidente da Xunta, Alberto Núñez Feijóo, requeríndolle novamente apoio para definir os incumprimentos da Lei de Incendios de Galicia en Ribadeo. O rexedor lembra que xa lle solicitou ese apoio o pasado 8 de febreiro e que ata o momento non houbo resposta por parte da administración galega. Suárez Barcia insiste en que os propietarios dos montes teñen ata o 31 de maio, en período voluntario, para desbrozar as súas propiedades co obxectivo de que existan unhas faixas de protección de 50 metros arredor das casas ou arredor dos núcleos rurais. De non ser así o Concello recorrerá ás multas ou ás execucións subsidiarias.
Fernando Suárez anunciou que “lle vimos de mandar esa carta ao presidente da Xunta, relativa a este traballo ímprobo, moi organizado, moi estruturado, que levamos facendo desde hai varios meses, no senso de requerirlle a moitísimos propietarios de montes que teñen que cumprir a lei autonómica de incendios forestais”.
O alcalde ribadense lembra que “tal e como marca esta lei da Xunta teñen de prazo ata o 31 de maio de cada ano, en período voluntario, para facer os desbroces necesarios para que existan unhas faixas de protección de 50 metros arredor das casas ou arredor dos núcleos rurais. No seu momento xa lle pedimos ao presidente da Xunta que nos axudase, non porque o teña que facer dunha maneira graciosa senón porque o marca a lei. Desde logo desde Ribadeo non queremos fuxir das nosas responsabilidades e sabemos que, para a prevención de incendios, tan importante é a actuación da Xunta de Galicia como a dos Concellos. No noso caso parece ser que hai unhas semanas foi moi mediático e tivo gran repercusión porque dos 313 concellos que hai no país, pois contados cos dedos dunha man son os que están intentando mandar cumprir a lei”.
O rexedor dixo que “nós non queremos ningún susto no verán, nós non queremos choros e bágoas despois para lamentarnos de que se hai un incendio o lume poida chegar ás casas porque non estaba a cumprir a lei. Teño que dicir que desde que lle mandamos inicialmente a comunicación ao presidente da Xunta, para que nos axudara tal e como marca a lei de incendios desde o punto de vista técnico e económico, o tempo vai pasando, o 31 de maio está aí ás portas, e non temos ningunha comunicación da Xunta”.
Suárez Barcia subliñou que “este apoio legal da Xunta é moi importante por canto necesitamos ao seu corpo de técnicos forestais para que nos vaian supervisando polo terreo, a pé de obra, cantas destas propiedades ao final de maio cumpriron co requerimento que nosoutros lles enviamos. Se enviamos 700 comunicacións e ao final de maio hai 300 que non cumpriron, para que os técnicos forestais da Xunta, de Medio Ambiente, nos digan quedan 300 que non cumpriron. A partir de aí o Concello si que, segundo a Lei de Incendios de Galicia, volveríalles mandar unha nova comunicación para darlles un prazo límite de 15 días. De non ser así o Concello podería instar á execución subsidiaria ou á imposición de multas coercitivas”.
O alcalde asegurou que “nós non queremos chegar a ningún extremo deses. Nin queremos poñer ningunha multa coercitiva nin queremos facer ningunha execución subsidiaria, pero se os propietarios non nos fan caso chegaremos aí e a onde faga falta. O que queremos é a colaboración, tal e como marca a Lei de Incendios de Galicia, do propio goberno galego. Polo que se ve igual está pensando noutras cousas, pero non tivo comunicación con nós, máis que unha breve comunicación dicíndome que ese asunto llo pasaban á Consellería do Medio Rural, pero nunca máis soubemos nada”.
Fernando Suárez engadiu que “quero dicilo en tempo e forma oportuno, é certo que aínda non estamos a 31 de maio, pero cada vez queda menos tempo e logo non queremos tensións nin problemas, sobre todo cando estamos invocando á lei vixente que leva máis de dez anos, e é unha lei galega que ten a obriga de cumprila o goberno galego”.