O PSOE da Pontenova frea o intento do PP de subir os impostos polo lixo aos veciños ao tempo que cumpre a lei

A Pontenova, 18 de abril de 2018.- O Tenente de Alcalde da Pontenova, o socialista Francisco Martínez Bermúdez, destacou este mércores que “dende o PSOE, como partido que representa aos veciños e defende sempre os intereses veciñais por riba de todo, conseguimos frear o intento do PP de subir os impostos polo lixo aos pontenoveses ao tempo que cumprimos rigorosamente a lei”.

Martínez Bermúdez explicou que “o Partido Popular dende a Xunta de Galicia e co beneplácito de todos os seus compañeiros do PP, impuxo, unilateralmente, a todos os Concellos unha suba do 34% no canon polo tratamento do lixo, o coñecido taxazo de SOGAMA. Dende o PSOE, nunca estivemos de acordo con este inxustificada, inxusta e desproporcionada suba, pois supón un novo hachazo do PP aos Concellos, ás entidades locais máis próximas aos cidadáns, ás que menos recursos económicos teñen e ás que verdadeiramente atenden e coñecen as necesidades dos veciños”.

Na Pontenova, o taxazo de SOGAMA que impuxo o PP conleva que o Concello pasase de ter a obriga de pagar 1.000 euros mensuais polo tratamento do lixo a aboar agora 6.000; uns 84.000 euros ao ano.

“Realizamos todos e cada un dos pagos, non tendo débeda algunha. E fixémolo sen que isto repercutise directamente no peto dos nosos veciños, que non pagan nin un só euro máis polo servizo municipal de recollida de lixo. Pagámolo con fondos locais. Polo tanto, o PSOE da Pontenova cumpre a lei pero consegue boicotear o intento do PP de asfixiar aínda máis aos nosos veciños coa suba de impostos e de culpar disto, por riba, aos Concellos co único obxectivo de limparse as mans”.

Mentres o PP na Xunta de Galicia quixo que os Concellos paguen 80 euros por cada tonelada enviada a SOGAMA en Asturias os municipios pagan 18 euros/tonelada. “Algunha explicación debería dar ao respecto o PP, pois dende do PSOE só entendemos isto como un novo intento dos populares de asfixiar aos veciños e ás entidades locais, coma sempre fan. E logo temos que escoitar a Feijóo como pide aos Concellos que baixe os impostos, que el mesmo sobe xunto co seu compañeiro Rajoy, como vimos co catastrazo. Leccións ningunha”.

“Estamos orgullosos de defender aos veciños dos abusos do PP, o que sempre fixemos e faremos; e de sanear ao mesmo tempo as contas municipais. O PP deixou unha débeda financeira na Pontenova de 1,7 millón de euros, que os socialistas, aínda todos os novos gravames e trabas que impuxo o PP dende a Xunta ou o Goberno Central, reducimos aos 400.000 euros”

“Ademais, pagamos ao día aos provedores, pois temos un prazo medio de pago de facturas moi inferior ao que fixa a lei. Temos liquidez e non deixamos de facer investimentos e melloras nos servizos públicos municipais que ofrecemos aos veciños. E sen ningunha axuda do PP dende a Xunta e o Goberno Central, aínda ser as principais administración no país, ás que xestionan os maiores orzamentos con fondos públicos de todos os veciños, tamén, por suposto, dos da Pontenova”.