Sesións de TaiJiQuan en Cervo

Cervo 8-10-18. O Pavillón da Veiga de San Cibrao acolleu esta fin de semana sesións prácticas de TaiJiQuan, impartidas por Zhang Yan Fei, da escola china Chen Jiagou, unha das máis prestixiosas deste país, e por conseguinte do mundo.
Asistiron 70 practicantes procedentes de todas as provincias galegas e de diferentes puntos da xeografía española (Madrid, Castela León, Asturias, País Vasco…).
O TaiJiQuan é unha arte marcial china, pertencente á Nei Jia ou “Familia Interna”.
A principal característica desta familia é que, a diferencia dos estilos externos de artes marciais, fai énfase no adestramento da respiración, a enerxía e a meditación, para lograr co tempo, efectividade marcial.
A cita foi organizada polo departamento de TaiJiQuan da Federación Española de Kickboxing (FEK) en colaboración co Concello de Cervo, que cedeu ademais o Pavillón da Veiga e as instalacións das Escolas de San Román onde se aloxaron as persoas participantes e os mestres vidos de China.
O rexedor, Alfonso Villares, achegouse ata o Pavillón, onde presenciou as sesións e puido saudar aos practicantes e ao mestre.