O Concello de Ribadeo presenta o proxecto de ordenanza reguladora do uso das praias, que podería entrar en vigor o vindeiro verán

 Ribadeo, 18 de xaneiro de 2020. O Concello de Ribadeo presenta o proxecto da nova ordenanza reguladora do uso das praias. O edil de Medio Ambiente, Jorge Díaz, agarda que estea lista para a súa aplicación o vindeiro verán. O concelleiro indica que se atenden así, entre outras cousas, as esixencias da Q de Calidade Turística e da Bandeira Azul.
Díaz Freije sinalou que “é unha ordenanza que recolle todo o que é o ámbito das praias: socorrismo, limpeza, uso dos areais, uso de embarcacións de pesca, actividades deportivas, animais e residuos, entre outros. É unha ordenanza que está traballada e que é bastante completa”.
O edil engadiu que “tamén é algo que nos requirían a Q de Calidade e a Bandeira Azul durante estes anos. É unha esixencia máis para ter estes requisitos que tanto nos aportan”.
O concelleiro de Medio Ambiente dixo que “agora está colgada na web do Concello, porque isto leva un procedemento administrativo, ten que ir a pleno despois e logo haberá outro tempo para presentar alegacións antes da súa aprobación definitiva. Entón hai que poñela a andar o antes posible para que cando sexa a tempada de praias estea xa operativa”.
O proxecto de ordenanza reguladora do uso das praias está colgado xa na web do Concello. A cidadanía, organizacións e asociacións que así o consideren poden facer chegar as súas opinións sobre os aspectos expostos durante o prazo de 10 días a contar desde mañá, 19 de xaneiro.