O alumnado de 4º de primaria do CEIP Virxe do Carme aprende con Gaia como chega a auga aos fogares

Burela, 23 de marzo de 2021. As monitoras do Centro de Educación Gaia do Concello de Burela realizaron hoxe no Ceip Virxe do Carme unha actividade titulada Como chega a auga aos nosos fogares. O destinatario foi o alumnado de 4º de Primaria.

As monitoras explican que “contámoslles que algo tan sinxelo e cotián como abrir unha billa e ver saír auga encerra un proceso, que moitos dos nenos e nenas non coñecían. O ciclo integral da auga comprende dende a captación, a potabilización e tratamento da auga recollida ata a súa distribución, o seu uso e posterior depuración e devolta ao medio ambiente en condicións óptimas que non prexudiquen ao medio ambiente”.

Desde Gaia engaden que “visualizaron unha reportaxe relacionada co proceso que segue a auga dende a súa captación ata que chega aos nosos fogares e posteriormente realizaron unha actividade práctica sobre o consumo de auga nos nosos fogares na que a través dunha ficha que representaba actividades cotiáns do día a día tiñan que marcar o tempo e os litros de auga que consumían. Remataron cun mural con gotas e cunha billa aberta no que cada neno escribiu nunha gota de auga varios consellos e recomendacións referentes ao aforro e a non contaminar a auga que debemos levar a cabo nos nosos fogares”.

Desde a Concellería de Medio Ambiente subliñan que “con estas actividades pretendemos concienciar ao alumnado de que, individualmente, poden contribuír ao aforro eficiente da auga”.