Daniel Vega agradece a participación dos veciños de Arante no cribado do Sergas

Ribadeo, a 13 de abril de 2021. O voceiro do Grupo Municipal Popular de Ribadeo, Daniel Vega, agradece a participación de practicamente toda a parroquia de Arante no cribado que realizou o Sergas este luns no pavillón municipal de Ribadeo onde os profesionais sanitarios realizaron 130 probas PCR aos veciños e veciñas. Coñecidos os resultados, Vega destaca que “non hai ningún novo positivo” entre os participantes no cribado.

Trala realización das probas, convida a “continuar cumprindo a normativa sanitaria porque é moi importante para seguir garantindo que Ribadeo sexa un espazo de seguridade sanitaria”.

Agradecementos
Vega agradece “aos profesionais sanitarios do Sergas polo seu traballo; así coma á xerente do hospital da Mariña; ao delegado territorial da Xunta, á xefa territorial de Sanidade”.

Tamén ten palabras de agradecemento para as asociacións de veciños de Arante, Remourelle, Bestilleiros, Vilamariz e A Ponte pola súa colaboración porque “o seu traballo facilitou un alto nivel de participación”. Nese sentido, Daniel Vega cre que “toda a parroquia foi un exemplo”.