Semella que o goberno de Ribadeo avanza na dirección contraria aos intereses do Partido Popular. As últimas declaracións do seu voceiro municipal amosan un nerviosismo que trasloce a súa incapacidade para achegar propostas e representar os intereses da veciñanza.
Eu podería caer na demagoxia e dicir que o voceiro do Partido Popular cobra máis do que merece, tal e como el me dixo a min fai uns meses nun pleno municipal, pero non o vou facer desde logo. Os seus case 73.000 € de soldo anual probablemente estean ben xustificados, e se deban ás moitas responsabilidades que ostenta. E de seguro que son ben importantes, porque recibe nin máis nin menos que a mesma remuneración que un Ministro do Goberno de España.
O que si quero, e debo, recordarlle ao voceiro do Partido Popular é que na política desde logo, non todo vale.
Non vale mentir, como cando dixo que a Xunta rehabilitara o colexio público cos seus fondos, facéndose fotos diante dun falso cartel, sabendo en realidade que a obra se pagou con fondos europeos transferidos polo Goberno do Estado á Comunidade Autónoma.
Non vale falsificar identidades que non lle corresponden, como cando intenta vender de maneira tardía, iso si, as poucas inversións que a Xunta de Galicia fai en Ribadeo, pretendendo ser o que non é.
Non vale enganar á veciñanza de Ribadeo, como cando repite ata a saciedade en varios plenos municipais que vai conseguir diñeiro para o acondicionamento da Estrada dos Garitos, aportando finalmente 0 € a unha obra financiada na súa totalidade polo Concello e a Deputación de Lugo.
Non vale suplantar a representación de Administracións nas que non ten ningún cargo e nas que non xestiona absolutamente nada, como cando se mostra como un pseudoconseguidor de non sabemos moi ben que.
Non vale, desde logo, traizoarse a un mesmo, pensando en que un o sabe todo, sen considerar os seus propios límites e actuando cunha total falla de humildade e honestidade. E na política, tampouco valen a hipocresía, a falacia nin a falta de integridade.
Eu como parte da equipa de goberno de Ribadeo, seguirei traballando xunto cos meus compañeiros e compañeiras en desenvolver tódolos proxectos que aínda nos quedan por executar. Proxectos que inciden na creación de espazos públicos de calidade, accesibles, seguros e con usos plurais.
E farémolo, malia a discriminación e ao cinismo dun goberno da Xunta de Galicia para con Ribadeo, e que de facto, e mentres asina convenios millonarios con outros concellos afíns, segue sen atender as súas responsabilidades, derivando aos concellos competencias que lle son propias, sen dotalas dos recursos correspondentes. O Concello de Ribadeo xestiona dúas residencias de maiores, cobre o deficiente financiamento do SAF ou asume o cumprimento da Lei de Prevención de Incendios, por poñer só uns exemplos.
Seguiremos actuando en rúas, prazas, parques infantís, espazos deportivos, locais sociais e na rede viaria municipal, compaxinando o avance na transformación necesaria coa urxencia de atender as demanda concretas da veciñanza, e seguirémolo facendo a pesar que ao partido popular non lle guste.
Mónica Freire Rancaño
Concelleira de Obras e Servizos Sociais de Ribadeo
Baixo o título “A guerra en Oriente Medio. Do xenocidio en Palestina á agresión a Irán”, o analista internacional Duarte Correa ofrecerá unha intervención centrada na evolución do conflito, o impacto humanitario e as implicacións xeopolíticas da escalada bélica na rexión.
A proba, organizada polo CP Altrúan, reunirá 137palistas dos seis clubs lucenses de augas tranquilas que participan na competición: o propio Altruán, o CD San Ciprián, o Club Kayak Foz, o CP Viveiro Urban Hotel, o Cidade de Lugo e o Club Fluvial de Lugo. O deputado de Mocidade Daniel García achegouse esta tarde a Ribadeo para presentar a proba, que comezará ás 15.30 coa saída dos prebenxamíns e benxamíns. A continuación e de forma escalonada, desenvolveranse as probas das categorías infantil, alevín e cadete e xuvenil.
A partir das 19:45 horas abrirán a xornada o Cuarteto Illa Pancha e Tradigalu, mentres que desde as 20:00 horas se poderán degustar hamburguesas á parrilla, bocadillos de panceta e chourizos asados. Xa pola noite, ás 21:30, tomarán o relevo Mi Rollo es el Rock, antes da tradicional fogueira de San Xoán, prevista para as 00:00 horas. A celebración, organizada por A Rebolaxe coa colaboración do Concello de Cervo e a Deputación de Lugo, inclúe tamén o sorteo dunha paleta de cocho e contará con aparcamento habilitado no Estanco da Praia do Torno.
A Garda Civil de Burela tomou declaración este 10 de xuño a unha representante do departamento en liña de Porcelana de Sargadelos, que denunciou unha estafa na que se emprega a imaxe da empresa para enganar clientes. Segundo explicou, desde finais de abril están a aparecer páxinas web falsas con descontos do 80% e perfís fraudulentos en redes sociais como Instagram, TikTok e Facebook, a través dos que varios usuarios xa foron estafados. A compañía presentou denuncias contra distintos dominios e contas, das que só unha continúa activa, e achegou tamén os rexistros da marca e as comunicacións realizadas ante Meta. A denuncia foi formalizada no cuartel da Garda Civil de Burela, onde quedou incorporada ás dilixencias abertas polo corpo.
O deputado galego Francisco Millán Mon explicoulles o día a día da súa actividade nesta cámara e a importancia da Unión Europea para Galicia e viceversa. Desde a dirección do centro agradecen “a súa exposición e o trato dispensado ao alumnado e profesorado desprazado a Bruxelas”. Neste 2026 cúmprense 40 anos da adhesión de España á Comunidade Económica Europea, así se denominaba naquel momento. O IES de Ribadeo é Escola Mentora do Programa Escolas Embaixadoras do Parlamento Europeo.
Foi unha xornada máxica na que a música e a convivencia se deron a man nunha contorna única. Os instrumentos de corda encheron de melodías os xardíns do centro, creando unha atmosfera especial que emocionou ao público asistente e puxo en valor o talento e a ilusión da mocidade. A alcaldesa de Cervo, Dolores García Caramés, non quixo perderse esta cita tan especial e desfrutou da tarde xunto ás persoas usuarias, e o persoal do centro. Durante o encontro, agradeceu o convite e felicitou á organización por promover actividades que fomentan a cultura, a inclusión e os espazos de encontro entre a veciñanza.
A mostra, aberta na sala de exposicións do Auditorio Municipal de luns a venres entre as 18:00 e as 22:00 horas, reúne preto de 30 obras de artistas emerxentes e consolidados, ofrecendo diversas miradas sobre a paisaxe, a identidade, a memoria e a realidade contemporánea. A alcaldesa, Marta Rouco, destacou o valor de que Vilalba forme parte desta programación compartida e o impacto positivo que supón para a actividade cultural local.
