Ribadeo, 2 de marzo de 2023. Acisa Ribadeo lanza unha nova campaña de captación de socios, que se prolongará ao longo das vindeiras semanas. O colectivo empresarial sumou 12 novos asociad@s nos últimos meses e conta con máis de 150 negocios adheridos.
Nos últimos meses decidiron darse de alta e formar parte da Asociación de Comerciantes, Industriais, Servizos e Autónomos de Ribadeo negocios como Vitaldent, Rotugraf, Eomática, Emerxe Solucións Enerxéticas, Lema, Ágora, La Galletería, Antiques Real Estate, Bimba 13 e Telepizza, e autónomos como Susana Álvarez ou Beni Mántaras.
Desde Acisa a súa presidenta, Carmen Cruzado, dixo: “gustaríame en nome da nosa directiva darlles a todas e todos publicamente a benvida á nosa asociación e aproveito tamén para animar aos negocios de Ribadeo: comerciantes, hostaleiros, industriais, servizos e autónomos, hoteis, etc, a que nos chamen para que os visitemos ou para que se acheguen ás nosas instalacións e lles expliquemos cara a cara todas as vantaxes que supón formar parte de Acisa. Aquí traballamos para dinamizar e potenciar a actividade económica de Ribadeo e para que iso repercuta no tecido empresarial”.
O xerente, Jesús Pérez, insistiu en que “en Acisa atoparán todo tipo de asesoramento sobre subvencións, axudas, programas específicos ou cambios normativos. Os asociados e asociadas contan con materiais gratuítos para os seus negocios como poden ser bolsas para o comercio e para a hostalería, envases de comida para levar, vasos térmicos, cartelería oficial, etc… así como todo o material das múltiples e variadas campañas que organizamos ao longo de todo o ano. Ademais temos asinados varios convenios de colaboración beneficiosos para todos os nosos asociados, que tamén lles axudarán a aforrar custes”.
Ao longo das vindeiras semanas representantes de Acisa achegaranse polos negocios de Ribadeo para informalos sobre as vantaxes que supón que entren a formar parte da asociación, que conta con 34 anos de vida. Pérez Prada sinalou que “calquera empresa interesada en obter máis información pode dirixirse á nosa oficina de luns a xoves de 9:30 a 14:30 e de 15:30 a 17:30 horas e os venres de 9:30 a 14:30 horas ou chamando por teléfono ao 663 39 62 26”.
Cruzado Iglesias engadiu: “estamos agora mesmo traballando nas campañas que se desenvolverán ao longo dos vindeiros meses, como as do día do pai e da nai, pero haberá novidades de aquí ao verán co reparto de moitos premios entre a clientela dos negocios locais. Tamén contaremos con novidades para os hoteis coas vistas postas na Semana Santa, tempada para a que tamén faremos promoción turística de Ribadeo. Cantos máis visitantes recibamos ao longo do ano mellores repercusións terán eses movementos na economía local. De aí que cada vez nos centremos máis na preparación de campañas que vaian desde setembro ata a primavera”.
O xerente engadiu que “buscamos novas formas de promoción para as nosas socias e socios, dándolles a oportunidade de ofertar convenios para o noso colectivo, e realizaremos campañas atractivas con novos formatos e con múltiples premios para seguir a fidelizar á clientela”.
Descontos no combustible
Desde a directiva de Acisa lembran que “ata o 31 de marzo segue a campaña que puxemos en marcha a finais de xaneiro con Gasóleos Abelleira, que supón un desconto de 0,10 euros/litro de combustible. Distribuíronse 50.000 tarxetas entre os negocios asociados a Acisa para que estes as repartan entre a súa clientela por gastos ou consumicións superiores aos 5 euros. Esta campaña será de aplicación unicamente na estación de servizo que se atopa situada no polígono industrial. Este desconto non é compatible con outras promocións de Gasóleos Abelleira”.
E engaden desde a Asociación de Comerciantes, Industriais, Servizos e Autónomos de Ribadeo: “esta é a terceira edición desta campaña con Gasóleos Abelleira, ao que lle agradecemos a súa disposición. É unha iniciativa que funciona e que ten moi boa acollida”.
Competirán durante tres días xunto a outras dezaseis escolas de todo o mundo, elaborando catro propostas de pizza: Polbo á galega, con polbo galego, queixo San Simón e allada picante; Bosque galego, con crema de castañas e mel picante; Terra meiga, con zorza picante; e Rapadoira, con setas, queixo azul e pera. As estudantes viaxan acompañadas pola súa profesora, Conchi Carreiras, coa que levan tempo preparando as receitas. Esta é a terceira participación do IES de Foz neste certame, no que xa acadaron un segundo posto en edicións anteriores. A actividade forma parte do programa Erasmus+ da FP, financiado pola Unión Europea, que facilita a participación do alumnado en competicións de habilidades profesionais por toda Europa.
A xornada comezará ás 12:00 h cun faladoiro titulado “Vizoso e nós”, no que participarán Pepe Penabade, Pepe Blanco, Caxigueiro, Aurelia Balseiro e Mª Cristina Rubal González, moderados por Antonio Reigosa. Ás 13:20 h abrirase a exposición “Xosé Vizoso. O neno que debuxou un cabalo”, que permanecerá dispoñible durante as festas de San Lucas. A partir das 13:45 h terá lugar o acto de inauguración e descuberta da placa da nova rúa Xosé Vizoso, na Praza da Fonte Vella, coa presenza de autoridades, familiares e amizades do artista. As persoas asistentes recibirán no auditorio unha lámina cunha obra de Vizoso como agasallo.
O sindicato denuncia a decisión unilateral da empresa de retirar días de descanso e implantar quendas que dificultan a conciliación. As concentracións serán nos centros de traballo de Foz (Uxío Novoneira s/n) e Ribadeo (Avda. Galicia 27). Lémbrase que non é unha folga e apélase á solidariedade da plantilla para defender as condicións laborais conquistadas.
Ás 15:15 horas deste martes, un particular solicitou asistencia sanitaria tras a caída dun raio no lugar de Castro de Igrexa (Cazás, Xermade). Varias persoas sentiron os efectos da descarga eléctrica e unha delas quedou atolada. Tras dar aviso ao Servizo de Urxencias Sanitarias de Galicia-061, Garda Civil e Protección Civil, a persoa afectada foi evacuada consciente ao Hospital Universitario Lucus Augusti.
A exposición, instalada no Centro Comarcal Pazo de San Tomé, invita a observar con calma, descubrir historias e poñer en valor un patrimonio vivo que forma parte da nosa identidade. Unha maneira diferente de achegarnos ao mundo rural que tanto significa para As San Lucas.
A viaxe, enmarcada no proxecto «Relevo Xeracional: O Futuro do Mar» e organizada en colaboración co GALP Itsas Garapen Elkartea, permitiu achegarse a iniciativas como Kofradia Basque Seafood, a Escola de Pesca de Ondarroa, AZTI, Albaola ou o Itsas Museo de Donosti, así como a proxectos vinculados directamente á actividade pesqueira e á divulgación, incluíndo o uso de realidade virtual. O intercambio con Euskadi permitiu coñecer modelos que combinan formación, investigación, transmisión do coñecemento e modernización do sector, contribuíndo a identificar novas vías para facilitar a incorporación da mocidade á actividade pesqueira e garantir a continuidade das comunidades costeiras galegas.
Os servizos sanitarios trasladaron ao hospital a tres persoas implicadas nunha colisión frontal en Castro de Rei. Unha delas tivo que ser excarcerada polos Bombeiros de Vilalba. Contra as 11:15 horas deste martes, un particular informou ao 112 Galicia dun choque entre dous vehículos no quilómetro 71 da N-640, á altura da parroquia de Viladonga. Desde o punto, os alertadores sinalaron que unha persoa permanecía atrapada. Desde o Centro Integrado de Atención ás Emerxencias activouse un operativo no que participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada. Os bombeiros liberaron á persoa, que foi trasladada xunto con outros dous feridos ao hospital en ambulancia.
