O Grupo Socialista propón crear un protocolo de baleirado dos encoros que protexa a produción marisqueira

Julio Torrado alerta de que os encoros se baleiran por decisión única das empresas eléctricas en función do seu beneficio económico

Santiago de Compostela, 14 de marzo de 2023. O vicevoceiro do grupo socialista, Julio Torrado, propuxo este martes na comisión de pesca a creación dun protocolo que regule o baleirado dos encoros, en especial os que afectan ás rías de Arousa e de Muros e Noia, que estableza distintos criterios que protexan a produción marisqueira.

O socialista trasladou á comisión de pesca do Parlamento unha reclamación “histórica” do sector do marisqueo e discutida en moitas ocasións na cámara galega, pero ao que a Xunta non deu solución algunha durante todos estes anos. Torrado expuxo datos que acreditan a crise que está a pasar este sector cunha caída do permex, pasando de 6.500 no 2009 a menos de 4.000 na actualidade, a pesar de que Feijóo prometeu chegar aos 8.000, e unha caída produtiva dos quilos recollidos de todas as especies.

Advirte de que un dos aspectos que provoca isto son os cambios bruscos de salinidade que empeoran a calidade do produto ou incluso fai que morran estes moluscos. Isto, sinala, débese en ocasións a choivas torrenciais, pero tamén aos baleirados masivos dos encoros por parte das empresas eléctricas.

En concreto levou á cámara a situación do marisqueo na ría de Muros e Noia e na ría de Arousa, dúas das máis fértiles en canto a produción que se ven afectadas por baleirados dos encoros do Tambre e do Ulla, respectivamente. No caso do primeiro, incluso teñen denunciado que “pola forza coa que baixa a auga pode chegar a poñer en risco ás persoas que están traballando”.

Alertou de que na actualidade, o baleirado dos encoros depende unicamente da decisión das empresas eléctricas, que actúan en función do seu beneficio económico. Por iso, esixía a creación dun protocolo tendo en conta que “os encoros están dentro dun contexto e xestionan un ben común”.

Neste senso, Julio Torrado reclamou que deben incorporar no protocolo aspectos como o nivel das mareas, proxección posibles chuvias, os tempos de marisqueo ou non estirar ata o máximo a capacidade dos encoros para que a descarga tralo baleirado non sexa tan violenta.

Ante o voto negativo dos populares que impediu a aprobación desta iniciativa, reprochoulles que neguen a “evidencia” de que hai “menos permex, menos quilos e menos cartos” para xustificar a súa defensa das eléctricas e que “baleiren os encoros como lles pete”, concluíu.