Intenso encontro cun ritmo trepidante, especialmente na primeira parte, no que as burelenses non lograron sobrepoñerse ás súas eternas rivais
Burela, 7 de decembro, 2024. Ás 11.00h desta mañá celebrouse a 13ª xornada da liga de Primeira División Iberdrola FS, o partidazo do ano, o clásico Futsi Atlético Navalcarnero – CD Burela FS, no pavillón La Estación de Navalcarnero. Partido de nivel, moi competido, pero no que as madrileñas se sobrepuxeron na súa cancha con bastante contundencia, cun resultado final 6-2.
Inicio de partido cun ritmo frenético imposto polo conxunto local, que comeza mostrando o seu lado máis ofensivo salvando Ana Eliza ata tres tiros a porta consecutivos no minuto 2. No 3 chega o 1-0 sen tiros a porta por parte do Burela FS, Laura Córdoba róubaa en cancha visitante, case a media pista, e métea dende a área nunha boa combinación con María Sanz. Equilíbrase o ritmo entre ambos os equipos, pero mantense ou aumenta a intensidade, con poucos tiros a porta por parte de ambos equipos nos próximos minutos. Quinta falta do burela no minuto 8 e dúas faltas do Futsi no minuto 9. Evita o empate Marta Balbuena no minuto 12 sacando a córner un disparo de Dinha tras roubala en área rival, a mellor oportunidade do Burela ata o momento. No minuto 14 a capitá madrileña, Anita Luján, consegue o segundo coándoa entre as pernas de Ana Eliza nunha contra, tras un roubo e pase de Irene Córdoba. Un minuto despois chega o terceiro, outro golazo, esta vez de María Sanz, que regatea a Antía Pérez e dispara case dende a frontal nunha boa xogada individual. A dous minutos do descanso consegue recortar distancias o Burela, cun golazo de Dinha que dispara tras un roubo, contraataque e pase de Emilly. Pero a uns segundos a mesma Dinha comete a sexta falta e María Sanz marca o 4-1 no dobre penalti. Dúas ocasións para o Burela no último minuto desta primeira parte, a primeira un disparo baixo boísimo de Emilly que se coa entre a defensa madrileña pero despéxaa a córner cun paradón co pé a porteira, e a décimas do toque de bucina case a mete Cami dende o segundo pau nun pase de Emilly tras unha boa triangulación con Patricia.
A primeira metade do segundo tempo mantense sen goles, continúa a intensidade e o Burela móstrase máis ofensivo. Con Caridad en portería, salva o quinto das locais no minuto 25 sacando co pé un disparo cruzado de María Sanz. Disparo á cruceta de Irene Córdoba nun tiro de falta boísimo no minuto 31 e paradón de Marta Balbuena a un disparo de Patricia xusto antes do golazo de cabeza de Antía Pérez tras unha recuperación entre Noelia Montoro e Patricia, realizando un pase maxistral a yeclana que finaliza Antía e consegue o segundo no mesmo minuto 31. Continúa o ritmo intenso con moitas idas e vidas e gran concentración por parte dos dous equipos tanto ao defender a súa portería como no intento de conseguir tirar a porta rival. Cando parecía que as madrileñas vivían o seu peor momento, chega o quinto, outro golazo, esta vez de María Moreno, que a recupera na área burelense e defínea meténdoa desde o bordo da área. Roza o pau un remate de cabeza de Cami tras un saque de banda de Antía Pérez no minuto 37. A 4 minutos do final do encontro Ari recupéraa preto da área e dispara, tocando o balón nas mans de Caridad pero sen conseguir despexalo.
Remata o partido cun resultado final 6-2 que permite ao conxunto de Joan Linares afastarse con 39 puntos da espreita das mariñás na táboa, manténdose estas segundas con 34 puntos, a expensas do resultado entre o Melilla e o LBTL desta tarde ás 19.30 no Javier Imbroda; encontro que pode baixalas ao terceiro posto en caso de vitoria para as locais, ou compartir ese segundo lugar na clasificación coas melillenses en caso de empate.
A fin de semana que vén as Pícaras enfrontaranse a outro clásico, o “Derbi das Costas”, ante o Poio Pescamar FS, en Vista Alegre ás 18.45h.
Ficha Técnica Futsi Atlético Navalcarnero 6-2 CD Burela FS
Futsi Atlético Navalcarnero (6): Marta Balbuena; Irene, María Sanz, Laura, Marian, –cinco inicial-, Ari, Anita Luján, María Moreno, Leninha. Entrenador: Joan Linares
CD Burela FS (2): Ana Eliza; Dinha, Cami, Carolina Pedreira, Patricia – cinco inicial-, Emilly, Dany (C), Antía Pérez, Cilene, Noelia Montoro, Débora, Caridad. Entrenador: Julio Delgado.
Goles: 1-0, min.3: Laura Córdoba. 2-0, min.14: Anita Luján. 3-0, min.15: María Sanz. 3-1, min.18: Dinha. 4-1, min.18: María Sanz. 4-2, min.31: Antía Pérez. 5-2, min.34: María Moreno. 6-2, min.36: Ari.
Árbitros: Cristian Cubero, Luis Manuel Manso, Georgiana Alina Bancu, Alba Villegas.
TA: Irene Córdoba, María Sanz, Dany, Antía Pérez.
A conselleira do Medio Rural, María José Gómez, acompañada pola directora xeral de Relacións Institucionais e Parlamentarias, Sandra Vázquez, e a directora xeral de Urbanismo, Encarnación Rivas, asistiu á ofrenda da Virxe dos Remedios en Mondoñedo.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continou con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
O próximo luns 14 de setembro comeza un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
