A Vicepresidencia da Deputación leva a Mondoñedo a exposición “Universo Vizoso”, aberta ao público no Centro Sociocomunitario

Lugo, 9 de maio de 2025. O Centro Sociocomunitario de Mondoñedo acolle durante este mes a exposición “Universo Vizoso”, comisariada por Aser Álvarez e promovida pola Vicepresidencia da Deputación de Lugo. A mostra reúne preto dun cento de carteis e ilustracións, que amosan a evolución creativa do artista mindoniense alén da súa traxectoria como deseñador de Sargadelos, e inclúe a súa escultura “San Froilán”, unha peza do Museo Provincial de Lugo que sae por primeira vez desta espazo para acompañar a itinerancia da exposición.

O vicepresidente da Deputación de Lugo Efrén Castro participou na inauguración onde explicou “que a mostra xurdiu como unha proposta para recoñecer e divulgar a obra de Xosé Vizoso no marco do Día da Ilustración, que se dedicou este ano á súa obra” e sinalou “a itinerancia da mostra en Mondoñedo como un recoñecemento e homenaxe á orixe, que estivo moi presente na súa traxectoria creativa a través de elementos como os cabalos”

Ademais da obra, a exposición inclúe fotografías do arquivo familiar de Xosé Vizoso e códigos QR con ligazón a pezas audiovisuais con diversos testemuños de Xosé Vizoso.

Texto de Aser Álvarez González, comisario da exposición

“Cando unha galiña pon un ovo faillo saber a toda a aldea, mentres que
unha troita deixa milleiros de ovos no río sen que niguén se decate. Con
este sinxelo exemplo describía Xosé Neira Vilas o traballo artístico de
Xosé Vizoso (Mondoñedo, 1950), un dos máis grandes artistas lugueses. No
bacharelato tivo de profesor ao escultor valenciano Juan Puchades, quen
estimulou nel a vocación polas artes plásticas. Con 18 anos comezou a
traballar en Sargadelos, no departamento de deseño, onde creou ducias de
pezas e deseñou e ilustrou centos libros. Pero Vizoso é tamén autor de
carteis e logotipos, así como escenógrafo, retratista, caricaturista,
pintor e muralista.

Aplicada á alta produción cultural, ao cartelismo, ao deseño gráfico e
industrial, á creación do obxecto único e belo e duradoiro para sempre,
a arte de Vizoso é múltiple e, sen nos decatar nós ás veces, o seu xenio
contrubuiu e contribúe de forma decisiva á formación da paisaxe visual
do noso tempo. Non só produce obras senlleiras ou modelos de obra
serializabel. Tamén, e ao mesmo tempo, dicta a sensibilidade e o estilo
colectivo da época co seu xenio artístico.

Coñecémonos con motivo dunha reportaxe televisiva que fixen sobre unhas
pezas que estaba a preparar para conmemorar o centenario do Quixote.
Fixémonos amigos e logo comezamos a argallar proxectos xuntos, coma o
mítico Mural do Furriolo, unha homenaxe ás vítimas da represión
franquista, “un berro de liberdade e diginidade”, como dixo Isaac Díaz
Pardo o día que o inauguramos nun acto memorable en Celanova (Ourense)
en 2006. Esta exposición é, xa que logo, un relato moi persoal e
fondamente marcado pola nosa relación de amizade. Velaquí unha pequena
mostra da súa obra como ilustrador, deseñador, escultor, cartelista,
muralista, pintor ou caricaturista, coa provincia de Lugo como fío
condutor.

Este proxecto nace cando descubro o Universo Vizoso na súa casa. Dende
ese día escoito falar as pezas, os bocetos e os cartaces das romerías e
festas populares, así coma os seus retratos tabernarios, murais e
ilustracións. Vizoso é moito máis que o seu traballo en Sargadelos. Por
iso quixemos axudamos a crear a súa propia web, un documental e esta
pequena exposición que é so un petisco dunha obra artística inmensa e
imprescindible na arte contemporánea galega. Unha viaxe iniciática polo
Universo Vizoso a través da provincia de Lugo. Un mundo ateigado de
tesouros que habitan o máxico universo deste artista total.”