ADEGA alerta de que este proxecto non se axusta ao principio de economía circular e está pragado de incertezas e omisións.
Santiago de Compostela, venres 13 de xuño de 2025. A Xunta vén de conceder unha DIA favorábel a unha fábrica de fibras de ENCE na balsa das Pontes, que de circular ten ben pouco. O obxectivo desta fábrica é a obtención de fibras de celulosa branqueadas (unhas 100.000 t/ano) a partir de cartón reciclado, con destino á fabricación de papel tisú. Este produto sería fabricado nesa faCtoría nunha segunda fase (aínda non avaliada nin concretada) ou noutras instalacións de ENCE.
Un proxecto “medio circular” pragado de incertezas e omisións
Na súa documentación, ENCE insiste en que o seu proxecto se axusta ao principio de economía circular ao usar cartón como materia prima, e xa que logo, “no se incrementará la demanda de madera de eucalipto en la región ni se promoverá el aumento de la superficie dedicada a su cultivo”. Resulta curioso que a propia Xunta asuma este postulado recollendo na DIA (p. 1) que “este proceso de fabricación de pasta de papel non require o consumo de biomasa arbórea, polo que se enmarca dentro dos principios de economía circular”.
Porén, para fabricación papel tisú, suposto obxectivo final do proxecto como recoñece a propia ENCE, adóitanse mesturar as fibras recicladas (FR) con fibra virxe (FV), nunha porcentaxe que abeira entre o 7% de FR (Sofidel) e o 29% de FR (Kimberly-Clark). Xa que logo, só unha parte da produción da futura fábrica das Pontes sería fibra reciclada, xa que para fabricar papel tisú se engadirá fibra virxe (entre un 93% e un 71% de FV) de eucalipto dos montes galegos elaborada por ENCE en Lourizán ou Navia. Cousas da economía “medio circular”.
Outro argumento que desmonta o argumento da circularidade invocado pola empresa é o feito de que “la energía que se utilizará en el proceso será de origen renovable, producida en la propia instalación gracias a una planta de cogeneración de calor y electricidad a partir de biomasa sostenible y de proximidad”, cunha potencia de 20 Mwt. Esa “biomasa sostenible de proximidad”, cifrada pola empresa en 60.000 t/ano, procederá das plantacións de eucalipto espalladas polas comarcas próximas, e a súa combustión (apoiada puntualmente con gas natural e gasoil) non é inocua: xerará gases de efecto invernadoiro, óxidos de nitróxeno, xofre e partículas, entre outras ducias de contaminantes dos que ENCE non informa.
Chuchar auga do “lago” das Pontes e vertela contaminada no Eume
O consumo de auga sempre é importante no caso das fábricas de pulpa de celulosa, mesmo que sexa reciclada. Neste caso, son 4.920 m3/día que a empresa prevé captar da balsa mineira que ocupa o antigo oco da mina de lignito, o mal chamado “lago” das Pontes.
Con todo, o principal problema desta instalación é a xestión das verteduras. Malia que no proceso de branquexo da fibra non se fai uso de compostos clorados, o proceso industrial produce 1,55 millóns de m3/ano de augas cunha alta carga orgánica (para 100.000 t de fibra). Estes efluentes serán deitados ao río Eume mediante un emisario duns 3 km, logo do seu procesado nunha planta de tratamento.
A carga contaminante dos efluentes logo do proceso de depuración, cando menos para pH, sólidos en suspensión, DBO5, temperatura, Ni disolto, Cu disolto e Zn disolto, incumpre os obxectivos de calidade establecidos no Plan Hidrolóxico de Galiza-Costa (ciclo 2021- 2027), Anexo IX, para a masa de auga Río Eume.
ENCE pretende acadar os valores sinalados como obxectivos ambientais para a antedita masa de auga mediante a dilución dos seus efluentes no río. Preténdese que sexa o Eume, un ben público, o que axude a acadar os limiares admisíbeis de contaminantes e non o tratamento ao que está obrigada a empresa.
ENCE gábase de que o consumo de auga da súa factoría non repercutirá no “lago”, polo enorme volume deste. Tendo en conta que a auga captada para o proceso debe ser previamente purificada, por que non verte os seus efluentes supostamente depurados na mesma balsa mineira, en troques de guindalos ao Eume?
Outro exemplo de transición ambientalmente inxusta
O feito de verter os efluentes do proceso produtivo ao río Eume en lugar de utilizar a propia balsa mineira como medio receptor, considerábelmente máis caudalosa e cunha hidroloxía máis estábel que o río, supón unha clara ameaza polos posíbeis impactos no Eume e na ZEC e parque Natural das Fragas do Eume, situado apenas 7 km augas abaixo. Tras décadas de vertidos e incumprimentos por parte de ENDESA no Eume, agora ENCE quere someter o río a unha nova presión.
Trátase dun proxecto que baixo a aparencia de circularidade, promoción da reciclaxe e sustentabilidade, agocha importantes eivas: non promove a economía circular, ao seguir sendo dependente da pulpa virxe -materia prima- para fabricar o produto final; provoca indirectamente máis eucaliptización; produce unha importante emisión de gases, partículas e substancias contaminantes e, sobre todo, usa o río Eume como medio receptor dos efluentes. Ambientalmente, isto está moi lonxe de ser unha “transición xusta”.
Baixo o título “A guerra en Oriente Medio. Do xenocidio en Palestina á agresión a Irán”, o analista internacional Duarte Correa ofrecerá unha intervención centrada na evolución do conflito, o impacto humanitario e as implicacións xeopolíticas da escalada bélica na rexión.
A proba, organizada polo CP Altrúan, reunirá 137palistas dos seis clubs lucenses de augas tranquilas que participan na competición: o propio Altruán, o CD San Ciprián, o Club Kayak Foz, o CP Viveiro Urban Hotel, o Cidade de Lugo e o Club Fluvial de Lugo. O deputado de Mocidade Daniel García achegouse esta tarde a Ribadeo para presentar a proba, que comezará ás 15.30 coa saída dos prebenxamíns e benxamíns. A continuación e de forma escalonada, desenvolveranse as probas das categorías infantil, alevín e cadete e xuvenil.
A partir das 19:45 horas abrirán a xornada o Cuarteto Illa Pancha e Tradigalu, mentres que desde as 20:00 horas se poderán degustar hamburguesas á parrilla, bocadillos de panceta e chourizos asados. Xa pola noite, ás 21:30, tomarán o relevo Mi Rollo es el Rock, antes da tradicional fogueira de San Xoán, prevista para as 00:00 horas. A celebración, organizada por A Rebolaxe coa colaboración do Concello de Cervo e a Deputación de Lugo, inclúe tamén o sorteo dunha paleta de cocho e contará con aparcamento habilitado no Estanco da Praia do Torno.
A Garda Civil de Burela tomou declaración este 10 de xuño a unha representante do departamento en liña de Porcelana de Sargadelos, que denunciou unha estafa na que se emprega a imaxe da empresa para enganar clientes. Segundo explicou, desde finais de abril están a aparecer páxinas web falsas con descontos do 80% e perfís fraudulentos en redes sociais como Instagram, TikTok e Facebook, a través dos que varios usuarios xa foron estafados. A compañía presentou denuncias contra distintos dominios e contas, das que só unha continúa activa, e achegou tamén os rexistros da marca e as comunicacións realizadas ante Meta. A denuncia foi formalizada no cuartel da Garda Civil de Burela, onde quedou incorporada ás dilixencias abertas polo corpo.
O deputado galego Francisco Millán Mon explicoulles o día a día da súa actividade nesta cámara e a importancia da Unión Europea para Galicia e viceversa. Desde a dirección do centro agradecen “a súa exposición e o trato dispensado ao alumnado e profesorado desprazado a Bruxelas”. Neste 2026 cúmprense 40 anos da adhesión de España á Comunidade Económica Europea, así se denominaba naquel momento. O IES de Ribadeo é Escola Mentora do Programa Escolas Embaixadoras do Parlamento Europeo.
Foi unha xornada máxica na que a música e a convivencia se deron a man nunha contorna única. Os instrumentos de corda encheron de melodías os xardíns do centro, creando unha atmosfera especial que emocionou ao público asistente e puxo en valor o talento e a ilusión da mocidade. A alcaldesa de Cervo, Dolores García Caramés, non quixo perderse esta cita tan especial e desfrutou da tarde xunto ás persoas usuarias, e o persoal do centro. Durante o encontro, agradeceu o convite e felicitou á organización por promover actividades que fomentan a cultura, a inclusión e os espazos de encontro entre a veciñanza.
A mostra, aberta na sala de exposicións do Auditorio Municipal de luns a venres entre as 18:00 e as 22:00 horas, reúne preto de 30 obras de artistas emerxentes e consolidados, ofrecendo diversas miradas sobre a paisaxe, a identidade, a memoria e a realidade contemporánea. A alcaldesa, Marta Rouco, destacou o valor de que Vilalba forme parte desta programación compartida e o impacto positivo que supón para a actividade cultural local.
