A Plataforma Sanitaria da Mariña leva anos denunciando a deficitaria dotación na comarca de ambulancias medicalizadas e de persoal

Hai uns anos eliminouse o segundo técnico única ambulancia medicalizada que hai na Mariña

A Mariña, 13 de agosto de 2025. En relación ás noticias de que na pasada fin de semana a dotación dunha única ambulancia medicalizada foi claramente insuficiente para a atención que se requeriu en diversas emerxencias que xurdiron, a Plataforma Sanitaria da Mariña quere explicar e aclarar que desde o colectivo “levamos bastantes anos denunciando esta situación de deficiencia que afecta ao transporte sanitario de emerxencias”.

A comarca da Mariña ten unha poboación estable de máis de setenta mil habitantes, poboación que nos meses de verán pode superar as duascentas ou duascentas cincuenta mil persoas. Na comarca a dotación é dunha ambulancia de soporte vital avanzado, que se tería que encargar de todas as emerxencias extrahospitalarias que requiran dese servizo. Máis esta única ambulancia non só realiza estas funcións, senón que está a efectuar traslados interhospitalarios que requiren da presencia de persoal facultativo, xa que o hospital da Mariña non dispón de suficiente persoal médico par poder asumir estas funcións, e que tradicionalmente si facían usándose para tales traslados unha ambulancia que se denominaba UCI móvil. Deste xeito, cando a ambulancia de soporte avanzado está a realizar un traslado interhospitalario a Mariña queda sen o servizo varias horas. Estes traslados son bastante frecuentes ao non poder asumilos desde o hospital por déficit de persoal, polo que hai moitos días durante bastantes horas que non se dispón o servizo para o que realmente foi creado.

“Pero é que a maiores o servizo resulta insuficiente dadas as especiais características da comarca, con poboación altamente dispersa, con lugares de moi difícil acceso nos que se inviste moito tempo para chegar, cunha distancia entre os extremos do territorio de oitenta quilómetros e cunhas estradas obsoletas desde hai trinta anos, que impiden uha áxil resposta ante as emerxencias”.

A solución do goberno da xunta foi permitir a eliminación do segundo técnico

Diante dos problemas de infraestruturas, distancias, accesibilidade, poboación estable, superpoblación nos meses de verán e a asunción de funcións impropias que enlentecen a resposta ás emerxencias, “a gran solución que deu o goberno da Xunta foi permitir que se eliminara a figura do segundo técnico de transporte sanitario na única ambulancia medicalizada que hai na Mariña. Esta figura profesional que foi eliminada resulta indispensable para o óptimo desenvolvemento das emerxencias extrahospitalarias, cumplindo funcións cruciais tanto durante o propio traslado como nas actuacións in situ nas emerxencias. A ausencia destes profesionais desde hai anos motiva que en moitas ocasións se teña que facer uso dun reforzo de soporte básico para suplir as funcións do técnico eliminado da dotación, e polo tanto quitando durante ese tempo un recurso que tería que estar realizando o seu traballo noutros lugares”.

“Desde este colectivo sanitario esiximos á Consellería e ao goberno da Xunta que dunha vez por todas comecen a pisar o territorio, desde o primeiro ata o último camino veciñal ou vivienda e planifiquen os servizos en función das necesidades e non dos recursos económicos nin dos plans espúreos de desmantelamento para a posterior privatización da sanidade. Montse Porteiro, coordinadora da plataforma sanitaria comenta que de todas e todos é sabido que os servizos públicos son moito máis costosos e dificultosos para administralos no rural, polas características territoriais de dispersión, difícil acceso ou outros máis neso consiste a equidade , que parece que tamén eliminaron ese concepto que define aos servizos públicos”.

Privilexios para a monarquía e recortes para a ciudadanía

Desde o colectivo sanitario tamén reprochan á Consellería “o desplegue de medios sanitarios pola visita dos reis xa que nesa ocasión si que houbo unha segunda ambulancia medicalizada, a pesar de que se atopaban a cinco minutos do hospital da Mariña e de que os servizos sanitarios estaban garantidos, segundo están a trasladar sempre. Máis non solo houbo unha ambulancia medicalizada en exclusiva para os reis, senón que esta ambulancia si estaba dotada ao completo, con dous técnicos de transporte sanitario a maiores de enfermeir@ e médic@”, polo que a conclusión á que chegamos é que quen xestiona a sanidade pública está a outorgar privilexios á monarquía mentres recorta á ciudadanía clarificando ben cales son os seus verdadeiros intereses e como entenden a equidade na atención sanitaria”, conclúen.