Isabel Rodríguez: “A provincia de Lugo conta hoxe cunha mellor calidade de vida que se materializa nun incremento do emprego, mellores pensións e a blindaxe dos dereitos”

A subdelegada sinalou o compromiso do Goberno na provincia, cunha pensión media de xubilación de 1.169 euros, 376 euros máis que en 2018

Lugo, 6 de agosto de 2025. A subdelegada do Goberno en Lugo, Isabel Rodríguez, destacou hoxe a mellora da calidade de vida na provincia con motivo do análise semestral de rendición de contas do Goberno de España, o informe ‘Cumprindo’. “Lugo ten hoxe mellor emprego, mellores pensións, mellores servizos e máis dereitos”, dixo.

Isabel Rodríguez sinalou o compromiso do Goberno con Lugo e subliñou que a pensión media de xubilación é de 1.169 euros na actualidade, 376 euros máis que en 2018.

Tamén fixo referencia á evolución positiva do emprego na provincia, que acadou no primeiro semestre do ano un total de 127.967 ocupados (no mes de xullo chegou a 129.416), o que supón 5.559 máis que en xuño de 2018, e un incremento do 148% dos contratos indefinidos respecto a 2019, ata 26.517.

Outro avance social importante é a consolidación do bono social eléctrico, que chega xa a 12.564 beneficiarios en Lugo e o ingreso mínimo vital (IMV) suma 17.378 perceptores na provincia desde 2020.

A subdelegada do Goberno en Lugo valorou o apoio firme e sostido do Goberno na provincia e no conxunto de Galicia nestes sete anos, nos que a comunidade recibiu 18.300 millóns de euros máis que nos sete anos anteriores, correspondentes a gobernos do Partido Popular.