O IES Dionisio Gamallo, en colaboración coa Cofradía de Pescadores de Ribadeo, realizou unha actividade para concienciar sobre o uso e abuso dos plásticos

Ribadeo, 22 de outubro, 2025. O IES de Ribadeo Dionisio Gamallo en colaboración con Dani Prieto, biólogo da Cofradía de Pescadores de Ribadeo realizou unha actividade para concienciar sobre o uso e abuso dos plásticos. Tivo lugar na Devesa, concretamente na Praia do Portiño e participou un grupo de 25 alumnos e alumnas de 4º da ESO coas profesoras de Bioloxía, Beatriz González e Susi Besteiro.

Tras unha breve exposición de Dani Prieto sobre a contaminación producida polo abuso dos plásticos na nosa sociedade e unhas indicacións sinxelas o alumnado dedicou case dúas horas á recollida tratando de seleccionalos segundo fosen ou non reciclables para poder depositalos despois nos contedores axeitados. As bolsas amarelas pouco tardaron en encherse de botellas, tapóns, bolsas e outros envases como bandexas porta-alimentos. As bolsas azuis e negras acabaron cargadas de moitísimos restos de redes, telas e prendas de roupa, chanclas, gafas de buceo, gomas do pelo, moitos anacos de plásticos duros e aínda que pareza mentira, un bó número de cartuchos de caza.

O alumnado quedou sorprendido pola cantidade recollida e pola variedade atopada, satisfeitos co traballo de limpeza realizado pero tamén coa impotencia de deixar a praia libre de plásticos. E xa nin pensar nos microplásticos, invisibles polo pequeno tamaño pero que tamén supoñen unha grave contaminación ambiental na terra, na auga, no aire e que pola cadea alimentaria chegan ata o ser humano onde xa se demostrou a súa presenza nos pulmóns e ata no cerebro.

É necesario crear conciencia ecolóxica e este tipo de actividades axudan. Polo tanto, agradecémoslle a Dani Prieto, ex-alumno do Instituto, a súa axuda para que as futuras xeracións sexan consumidores responsables capaces de reducir, reutilizar, reciclar e non depositar o lixo onde non é agradable atopalo. Respetando a natureza, respetámonos a nós mesmos.