O BNG de Viveiro lamenta o “despilfarro económico polo retraso na licitación dunha empresa de servizos enerxéticos”

Viveiro, 15 de novembro, 2025. O BNG de Viveiro ven de presentar no pasado pleno un rogo interesándose pola demora na licitación dunha empresa de servizos enerxéticos, atraso que lle está a custar miles de euros ao mes ás arcas municipais.

O concelleiro Seve Salgueiro, indicou que “non existe dúbida da urxente necesidade de rachar co actual contrato de subministro eléctrico polo elevadísimo custo que supón, sendo a contratación dunha empresa de servizos enerxéticos a mellor opción para o aforro enerxético e económico. Xa en febreiro, o goberno do BNG tiña avanzado un informe co compromiso de sacar a licitación en xuño, pois quedaban flecos por pechar e, ao ser un contrato dun importe elevado, debería pasar polo Consello Consultivo. Tras a moción de censura, o PP decidiu paralizar este proxecto porque, en palabras do Tenente Alcalde, “non o entende” e “non lle convence”. Pero cando se lle pregunta quen o asesora, non responde. É un despilfarro incomprensible, no lugar de avanzar no proxecto feito, podendo incorporar ou modificar o que estimen convinte, rachan o contrato, encargan outro informe por 6000€ e demoran os prazos malgastando miles de euros ao mes”.

Ante a pregunta do BNG de se o goberno cuantificou o sobrecusto que lle supón esta demora, “non houbo resposta. Nin o saben, pero pode chegar ás cinco cifras. O que está claro é que ao PP dalle alerxia calquer avance do goberno do BNG, e queren eliminalo custe o que lle custe ao Concello. Se algo trae o selo da Xunta, deféndeno aínda que sexa malo para Viveiro. Este Goberno é unha sucursal do PP pensando únicamente no rédito eleitoral.”