O PP insiste en que “a Deputación debe ser motor da provincia” e esixe apoiar aos autónomos e mellorar a seguridade nas vías provinciais en confluencia co Camiño de Santiago

Os deputados do Grupo Provincial Popular agardan o apoio do goberno ás súas propostas para o Pleno deste martes na Deputación de Lugo

Lugo, 24 de novembro de 2025. O desenvolvemento da provincia é unha das materias pendentes do goberno provincial de PSOE e BNG. De feito, os deputados do Grupo Provincial teñen insistido en que “a Deputación de Lugo debe ser o motor da provincia”.

Os populares proporán para o Pleno deste martes que a Deputación de Lugo traslade a súa oposición á política fiscal do Goberno de Sánchez sobre os autónomos, “un sector chave dentro da economía lucense, galega e nacional”.

Os populares instan ao Goberno de España a cumprir os compromisos adquiridos cos autónomos en 2023, impulsando as reformas pendentes en materia de protección social, pluriactividade, conciliación e simplificación burocrática, e establecendo un calendario claro de seguimento e avaliación de ditas medidas, en diálogo coas principais organizacións representativas do sector.

E urxen a poñer en marcha de forma inmediata a aplicación do réxime de franquía do IVE previsto pola Directiva Europea, que permite eximir do pago e a presentación de declaracións de IVE aos autónomos e pequenas empresas cunha facturación anual inferior a 85.000€, o que suporía un importante alivio fiscal e administrativo para o colectivo.

“Non é o momento de castigar máis ao tecido produtivo, senón de acompañar, facilitar e protexer a quen mantén a actividade económica en momentos de incerteza tanto nas grandes como nas pequenas e medianas localidades do noso territorio”, segundo manifesta o portavoz, Antonio Ameijide.

Por outra banda, os deputados populares instarán ao goberno provincial de PSOE e BNG a colaborar para mellorar a seguridade nos tramos do Camiño de Santiago que conflúen coas vías provinciais ao seu paso pola provincia de Lugo. Deste xeito, mellórase a seguridade viaria e a calidade das rutas e protéxese aos veciños e peregrinos.

Ameijide subliña que “o Camiño de Santiago é un importante atractivo turístico que, a través das distintas rutas, atrae a moitos peregrinos que visitan a nosa provincia ao longo de todo o ano dinamizando a vida social, cultural e económica en moitos puntos da provincia constituíndo unha fonte de oportunidades, especialmente, no rural”.

Os populares propoñen realizar actuacións para mellorar a seguridade nalgúns puntos perigosos. Algúns exemplos atópanse no municipio de Lugo como no núcleo do Burgo, na LU-P-2901, onde os peregrinos camiñan por unha vía estreita e sinuosa na que o tráfico adoita circular a velocidades elevadas; no cruzamento das estradas LU-P-2901 e LU-P-1611 (Lugo – Guntín) onde conflúen numerosos vehículos e con visibilidade limitada ou na LU-P-2917, en Gondar, onde a estrada con numerosas curvas carece de espazos seguros para peóns.

Algúns outros exemplos na provincia onde convén intervir de xeito inmediato son, por exemplo, na zona de Coto por onde discorre o Camiño Francés pola LU-P-4001, nas inmediacións da capela do Carme en Ribadeo por onde pasa o Camiño do Norte pola LU-P-5702 ou na LU-P-1801, de Líncora a Chantada, no Camiño de Inverno.

ROGOS E PREGUNTAS

Os deputados provinciais do Partido Popular tamén lembran a necesidade de manter limpas as cunetas das vías provinciais, especialmente agora no inverno: “coa chegada de importantes choivas, a auga desborda e discorre pola calzada en numerosos puntos poñendo en risco aos usuarios”. Un exemplo da falta de limpeza das marxes das vías da Deputación atópase en Lugo, na LU-P-2902.

Tamén piden os populares que o goberno provincial de PSOE e BNG reciba e escoite á asociación Patrimonio Naviego para estudar e valorar a posibilidade, entre a Deputación e o Concello de Navia, de darlle novos usos á Casa Benedicto, un inmoble titularidade da Deputación de Lugo; e que, mentres, cumpra co seu deber de conservar a poñer en valor o seu patrimonio e, particularmente, este inmoble.

Na quenda de preguntas, os deputados do PP esixen que o goberno provincial se posicione sobre a súa intención de realizar as intervencións necesarias para suprimir un tapón urbanístico na LU-P-2801, ao seu paso por Santo Tomé (Lourenzá), en caso de que os titulares do inmoble estean dispostos a ceder a propiedade co obxectivo de mellorar a seguridade viaria na zona.

Tamén esixen que o presidente aclare se vai tomar algún tipo de medida ou vai seguir permitindo comportamentos autoritarios e antidemocráticos por parte de membros do seu goberno.