Reencontro dos antigos alumnos do Colexio Pedrosa Latas de Celeiro que este ano cumpren 60 anos

Viveiro, 17 de novembro, 2025. A pasada fin de semana celebrouse no restaurante Louzao de Area un emotivo reencontro dos antigos alumnos e alumnas do Colexio Pedrosa Latas de Celeiro, que este ano cumpriron 60 anos de edade, “como se soe decir da quinta do 65”, pertencentes ás promocións que cursaron estudos a finais dos anos 60, durante a década dos 70 e comezos dos 80. A xuntanza, organizada con motivo de que este grupo de compañeiros acaba de cumprir 60 anos de idade, reuniu finalmente a 27 participantes.

Malia que algúns antigos estudantes non puideron asistir por diferentes motivos, o ambiente foi marcadamente entrañable e festivo. Para moitos, foi unha oportunidade única para recuperar amizades, compartir lembranzas da infancia e da adolescencia, e recordar a importancia que aquela etapa educativa tivo nas súas vidas.

Un dos momentos máis significativos da xornada foi a homenaxe ao compañeiro José Ramón Pino Pérez, coñecido como “Cachón”, falecido hai xa catro anos. En sinal de recordo e respecto, unha representación do grupo achegouse ao cemiterio para depositar un ramo de flores no seu nome. O xesto foi salientado polos asistentes como unha maneira de manter vivo o seu recordo e facelo partícipe do reencontro.

A organización destacou que esta xeración nunca chegara a celebrar as efemérides habituais que outras promocións adoitan conmemorar, como os 40 ou os 50 anos. Por iso, este encontro dos 60 adquiriu un valor especial, consolidándose como unha celebración única e moi agardada.

A comida de confraternidade estendeuse durante varias horas, na que non faltaron fotografías antigas, anécdotas, risas e emocións. Moitos dos asistentes expresaron o seu desexo de repetir a experiencia no futuro e de manter o vínculo que se formou na súa etapa escolar.

O reencontro rematou cun agradecemento xeralizado a todos os participantes, tanto aos presentes como aos que, por diversos motivos, non puideron achegarse pero continúan formando parte desta historia común.