O PSdeG de Xove denuncia a “situación terceiromundista” da auga da traída e acusa ao alcalde de “ocultar un problema recorrente”

Os socialistas sosteñen que o alcalde desvía a atención e lembran que os problemas se repiten cando hai choivas intensas pola falta de investimento

Xove, 5 de decembro de 2025. O PSdeG-PSOE de Xove denuncia a grave situación da rede municipal de abastecemento de auga, logo de que nos últimos días a auga chegase ás vivendas “nunhas condicións lamentables, máis parecida a barro que a un servizo potable”.

A formación subliña que o sucedido non é un feito illado, como tenta facer ver o alcalde, senón “un problema recorrente que se manifesta cada vez que chove con certa intensidade”.

Para os socialistas, o episodio rexistrado esta semana volveu evidenciar o deterioro estrutural das infraestruturas. Consideran insuficiente a explicación do goberno local, que atribúe a turbidez a un movemento de terras puntual, porque “calquera episodio de chuvia moderada provoca arrastres nos ríos, e iso non debería colapsar un sistema de traída que estivese en bo estado”.

O PSdeG lembra que a actual rede de Xove foi construída nos anos 90 e que o chamado embalse do Turrillón -presentado polo alcalde como captación principal- “é unha infraestrutura mínima, máis propia dunha presa dun muíño antigo que dunha instalación moderna capaz de garantir o abastecemento dun municipio enteiro”. Engaden que o resto dos elementos da rede, como o punto de bombeo de Rego Sanguento ou o depósito de Montevelle, acumulan máis de tres décadas sen renovación. “Non hai filtros nin equipos de decantación, non existe control de turxidez e todo o conxunto está totalmente obsoleto”, denuncian.

A situación, apuntan, xa foi avalada por un estudo técnico solicitado polo propio grupo municipal, que estima en preto de 1,5 millóns de euros o investimento necesario para modernizar a rede. “Non falamos de opinións, senón dun diagnóstico técnico claro que o alcalde leva anos ignorando”, insisten.

Neste escenario, o PSdeG critica con dureza a resposta do rexedor, que “no canto de asumir a realidade, dedica o seu tempo a buscar culpables externos”. Engaden que “é moi propio do PP evitar responsabilidades: ou é culpa dun veciño ou é culpa de Pedro Sánchez, pero nunca da súa inacción”. Lembran, ademais, que Salgueiro leva 18 anos na alcaldía ”sen impulsar nin unha soa mellora relevante na traída”.

Por iso, instan ao alcalde a abandonar “a estratexia de distracción” e a reclamar con seriedade á Xunta os recursos necesarios para acometer estas actuacións. Recordan tamén que o PSdeG xa trasladou ao Parlamento galego unha emenda para incorporar nos Orzamentos de 2026 unha partida destinada á renovación integral da rede, “porque Xove non pode continuar con instalacións do século pasado”.

“Falamos dun servizo esencial, básico para a saúde e o benestar da veciñanza. depender de instalacións que fallan con cada episodio de chuvia nin vivir coa incerteza de se a auga chegará limpa ás casas. Xove necesita unha rede moderna, segura e estable, e é hora de que tanto o alcalde como a Xunta deixen de mirar para outro lado e afronten dunha vez a solución definitiva”, conclúen.