Pontón reitera que unha persoa acusada de acoso sexual non pode formar parte do goberno da Deputación de Lugo

Reafirma o apoio do BNG ás mulleres que tiveron a valentía de denunciar unha situación “que nos repugna”

Santiago de Compostela, 11 decembro 2025. A portavoz nacional, Ana Pontón, referiuse desde Vigo á dimisión de José Tomé como presidente da Deputación de Lugo e reiterou que unha persoa acusada de acoso sexual non pode formar parte do Goberno da Deputación, nin seguir á fronte da institución.

A preguntas dos medios logo dunha comparecencia sobre a privatización dos servizos de saúde na área sanitaria de Vigo, Pontón quixo reafirmar en primeiro lugar o apoio do BNG ás mulleres denunciantes.

“As nosas primeiras palabras teñen que ser de solidariedade e de apoio ás mulleres que sufriron unha situación que nos indigna, que nos repugna, unha situación que a calquera persoa lle ten que revolver algo por dentro e, polo tanto, o primeiro é precisamente acompañar ás mulleres que presentan unha denuncia”, remarcou.

Pontón explicou que a posición do Bloque foi moi clara desde o primeiro momento e que non se vai mover “nin un ápice” dela, dado que unha persoa con “acusacións tan graves como é o acoso sexual, non pode estar á fronte” da Deputación de Lugo.

“Cremos que por dignidade, por respecto á política e por respecto á cidadanía, o que tiña que facer era dimitir de todas as súas responsabilidades”, afirmou para indicar a continuación que “o ideal sería que esa persoa que forma parte da dirección do Partido Socialista dimitira de todas as súas responsabilidades e de todos os seus cargos”.

Unha renuncia, aclarou a preguntas das e dos xornalistas, que incluiría a acta de deputado provincial, dado que “sería o mellor para a institución e o mellor para a política”. “Indígnanos que algo así poida pasar, pero creo que o máis terrible é que alguén poida pensar que este tipo de comportamentos é algo que está xeneralizado”, afondou.

“Sempre digo que non todos e todas somos iguais”, remarcou a líder nacionalista, quen subliñou que o BNG “fixo o que tiña que facer” e “actuou con contundencia”. “Estamos do lado das vítimas e este tipo de comportamentos o que non poden é empañar o labor que facemos, un labor moi digno que é representar á cidadanía e ser parte da solución para os problemas que hoxe teñen miles de galegos e de galegas”, afondou.

Preguntada polo posible coñecemento previo no PSdeG dos feitos denunciados, Pontón indicou que esa é unha pregunta que hai que dirixir ao propio PSdeG. “Eu son a portavoz nacional do BNG e o que podo dicir é que nós fixemos o que tiñamos que facer nese momento que era, desde o primeiro minuto, dicir que unha persoa á que se lle fan acusacións tan graves non pode seguir á fronte dos seus cargos e que ten que dimitir”, reiterou. “Nós, desde logo, non iamos compartir goberno cunha persoa con esas acusacións e nesa mesma posición estamos”, concluíu.