A Mariña, 22 de xaneiro de 2025. A Mancomunidade de Concellos da Mariña Lucense presentou este xoves en FITUR a figura de Sargadelos coa que se rende unha merecida homenaxe ás Carolas ou Canouras, consideradas pioneiras da actividade turística na Mariña. Esta proposta quere poñer en valor a aquelas mulleres labregas que, a finais do século XIX e sobre todo no século XX, chegaban acompañadas pola familia e as veciñas ata a costa da Mariña procedentes das zonas do interior da comarca e da provincia de Lugo para tomar os “baños de mar”.
A figura deuse a coñecer hoxe no discurso da presentación A Mariña, unha viaxe á identidade, un acto celebrado no stand de Galicia e dirixido a autoridades, turoperadores, prensa especializada e profesionais do sector turístico. Os asistentes foron os primeiros en coñecer esta peza que xorde da colaboración da Mancomunidade coa emblemática marca galega de cerámica Sargadelos, profundamente vinculada ao territorio da Mariña Lucense. A peza, que quere sintetizar a identidade do destino, foi elaborada como agasallo institucional e estase a valorar a súa futura comercialización.
No acto interviñeron a presidenta da Mancomunidade, Rocío López; o delegado territorial da Xunta de Galicia na provincia de Lugo, Javier Arias; a presidenta da Deputación de Lugo, Carmela López e o delegado do Goberno en Galicia, Pedro Blanco.
Figura A Carola
As Carolas ou Canouras chegaban á costa da Mariña nas primeiras semanas de setembro para darse 9 baños no mar durante 9 días consecutivos, un número impar máxico da tradición galega, e facíano por prescrición médica ou pola sinxela recomendación doutros coñecidos. Durante eses días aloxábanse na zona, en lugares como Ribadeo, Foz, Barreiros ou Viveiro. Aínda que xa está documentada a súa existencia no século XIX, foi a partir da apertura da Caseta de Baños La Cantábrica, na praia de San Miguel de Ribadeo, cando máis afluencia se rexistrou.
Esta homenaxe forma parte da estratexia que vén desenvolvendo a Mancomunidade nos últimos anos ao abeiro do Plan de Sostibilidade Turística, ferramenta impulsada pola Secretaría de Estado de Turismo, e dos convenios anuais de colaboración coa Xunta de Galicia e coa Deputación de Lugo, e que afonda na identidade do territorio a través dos seus valores, das súas tradicións e das súas xentes. Durante o acto, a presidenta da Mancomunidade, Rocío López, tivo palabras de agradecemento para todas aquelas persoas que traballan “para a recuperación desta figura, investigando e divulgando a través de colaboracións, conferencias, publicacións, programas turísticos e culturais, visitas guiadas e mesmo retomando a tradición en setembro de regalarse 9 sanadores baños de mar”.
Tal como explicou a presidenta da Mancomunidade no discurso de presentación, recuperar a figura das Carolas é sinónimo de manter a identidade, o carácter e a autenticidade do territorio: “estamos orgullosas de ser quen somos e do territorio que habitamos e queremos compartilo co mundo”, salientou. “As Carolas descubriron a nosa paisaxe, desfrutaron do noso mar e forman parte do patrimonio inmaterial do noso territorio”, compartiu Rocío López, quen manifestou que, sen lugar a dúbidas, esta homenaxe é unha “reivindicación necesaria sobre esta figura que forma parte indiscutible da nosa historia turística e cultural”.
Propostas turísticas
Autoridades, turoperadores, prensa especializada e profesionais do sector tiveron a oportunidade de coñecer de primeira man os proxectos que se veñen desenvolvendo na Mariña nos últimos anos no marco dos convenios anuais coa Xunta de Galicia e a Deputación de Lugo e máis salientablemente do Plan de Sostibilidade Turística na Mariña Lucense, financiado pola Xunta de Galicia, a Secretaría de Estado de Turismo e a propia Mancomunidade de Concellos co apoio da Deputación de Lugo, así como as novas propostas, coas que se da un paso máis na posta en valor do territorio.
Nesta liña, a presidenta da Mancomunidade lembrou que nos últimos anos desenvolvéronse diferentes proxectos cos que “construír un destino integrado, sostible e atractivo, para ampliar a temporada turística e para atraer novos segmentos”. Trátase, tal como afirmou, dunha “aposta por un modelo que respecta e protexe o patrimonio da Mariña, que aporta valor á sociedade e que pensa nas persoas”. Para Rocío López non hai dúbida: “hoxe amosamos ao mundo unha marca turística sólida, que se abre camiño entre outros grandes destinos”.
Así, lembrou que a construción deste modelo turístico sostible descansa en iniciativas como os Plans e Obradoiros con Corazón, que achegan a diversidade do territorio a través dos guías e artesáns locais; a implantación do SICTED, que impulsa a calidade turística nos destinos a través dos seus produtos e servizos; a promoción do turismo ornitolóxico e o xeoturismo, con programas de formación, material divulgativo e o I Encontro NatureWatch A Mariña; o I Foro de Turismo e Sostibilidade, que puxo a Mariña no foco do debate sobre o turismo sostible da man de expertos internacionais; a creación do Colectivo de Gastronomía da Mariña, para dar valor ao sector; ou o mantemento da rede de aloxamentos Turismo Slow Norte de Galicia, que aglutina a empresas especialmente sensibles cun modelo de xestión sostible.
Neste punto, quixo lembrar ás institucións e ás persoas que creron que un turismo sostible é posible na Mariña e que, co seu traballo, contribuíron para avanzar cara ese modelo de futuro. “Grazas por confiar e por achegar o voso gran de area”, manifestou.
Fitur 2026
A Mancomunidade está presente en FITUR para manter tamén xuntanzas con profesionais do sector, representantes doutros destinos e provedores de servizos, co obxectivo de comunicar os activos da Mariña, promover sinerxias e intercambiar información sobre servizos e produtos de potencial interese para o xeodestino.
O día 23 a Mancomunidade formará parte da mesa redonda Turismo e sector primario: novas sinerxias para o desenvolvemento local dentro da programación das xornadas Fitur Know-How & Export e no contexto do modelo MISEA da Secretaría de Estado de Turismo e que se está implementando na Mariña a través de SEGITTUR.
A Mancomunidade conta cun espazo de información turística dentro do stand de Galicia, no que ten a disposición dos visitantes diferentes materiais corporativos, como a guía A Mariña al descubierto, o mapa turístico e os folletos de turismo ornitolóxico e xeoturismo, entre outros.
Un ano máis, a Mancomunidade aproveita o espazo de promoción internacional de FITUR para dar a coñecer a súa oferta turística e, ao mesmo tempo, establecer contactos interesantes para o impulso da Mariña como territorio de referencia no sector do turismo.
Viveiro, 20 de abril, 2026. A proba volveu converter Viveiro nun punto destacado do deporte e da convivencia, ademais de supoñer un impulso económico para o municipio. María Loureiro destacou que a Camovi “é un exemplo de colaboración e esforzo colectivo, que sitúa Viveiro no mapa e dinamiza a economía local”. O Partido Socialista lembra o seu apoio histórico á carreira e reafirma o seu compromiso para seguir contribuíndo ao seu crecemento. O PSOE agradece tamén á veciñanza a súa acollida e implicación, fundamentais para que o evento continúe medrando ano tras ano.
Castro destacou o labor da Asociación e o potencial da tradición do ferro como motor económico, social e cultural para Riotorto, subliñando a importancia de impulsar iniciativas que garantan futuro para estes oficios. A Deputación de Lugo mantén unha colaboración estable coa entidade, cunha achega de 14.000 euros. No marco deste apoio, a Asociación avanzou na documentación dos oficios do ferro, catalogando ferramentas, técnicas e a historia das antigas “ferrerías de monte”.
O responsable provincial destacou "o traballo realizado pola organización ao longo destes anos para consolidar unha proba deportiva de primeiro nivel, que atrae tanto deportistas do máximo nivel competitivo como participación popular"
O grupo teatral O Centiño de San Martiño (Foz) actuou este sábado en Marzán, convidado pola asociación veciñal Torques de Marzán. O local quedou pequeno ante a resposta do público: 73 persoas, un récord de asistencia para unha obra de teatro na parroquia. A comedia provocou constantes risas e un ambiente moi participativo. A iniciativa volve demostrar o valor de levar actividade cultural e teatro afeccionado ás parroquias e barrios, achegando propostas escénicas a lugares afastados dos grandes circuítos. O Centiño continuará a xira de “O Autobús” nas vindeiras semanas: Sábado 25 de abril: Vilaronte (Foz). Sábado 2 de maio: Casa da Cultura de Trabada
A xornada contou con degustación gratuíta de viños elaborados por adegas da contorna, unha cata comentada e un mercado de produtos gastronómicos locais, permitindo aos asistentes coñecer de primeira man a riqueza do produto de proximidade. O pregón desta edición correu a cargo de Alejandro Gándara, quen presentou o seu proxecto audiovisual 360 curvas, unha obra que reflexiona sobre a distancia entre A Fonsagrada e Lugo e sobre o conflito social e político asociado á perda da súa condición de cabeceira de comarca, no marco da loita contra a despoboación.
Haberá degustación diaria de ostras na carpa do porto. Concertos, showcookings, visitas guiadas e actividades mariñeiras. Lancha pola ría, exposición de maquetas e concurso fotográfico #somoslasostra2026, ademais propostas especiais en Acueo, La Casilla e Restaurante Peñalba.
A etapa, cun percorrido duns 150 quilómetros, partiu arredor das 11:30 horas e rematou en Barreiros, atravesando concellos como Xermade, Muras, Viveiro ou Foz. A proba reúne a equipos do ciclismo profesional internacional e sitúa a provincia de Lugo como escenario dunha das citas deportivas máis destacadas do calendario. O Goberno colabora no desenvolvemento da carreira a través das Forzas e Corpos de Seguridade do Estado, que velan polo correcto desenvolvemento da proba e pola seguridade de participantes e afeccionados.
