O PSOE de Viveiro acusa á Xunta de manter vacante a Delegación de Mar e Pesca por intereses partidistas

Viveiro, 31 de xaneiro, 2026. O Partido Socialista de Viveiro e da Mariña manifesta a súa preocupación pola situación que vive a provincia de Lugo, que leva dez meses sen delegado ou delegada de Mar e Pesca, un posto clave para o funcionamento do sector e para garantir unha interlocución directa co sector mariñeiro.

Segundo sinalan, esta ausencia de nomeamento prexudica gravemente o servizo público, ao deixar sen dirección política unha área esencial nun territorio cunha relevancia pesqueira tan destacada como a Mariña.

O PSOE lembra que a anterior responsable da Delegación é quen hoxe exerce como alcaldesa de Viveiro, cargo que asumiu tras prosperar unha moción de censura. Durante a súa etapa á fronte da Delegación —cando era concelleira na oposición—, o posto foi utilizado, segundo denuncian, como plataforma de proxección política municipal, chegando a funcionar como un auténtico trampolín político.

Desde o Partido Socialista explican que, en numerosas ocasións, reunións de traballo entre a Xunta de Galicia e o Concello de Viveiro —con directores xerais ou responsables de área—, que deberían celebrarse no propio Concello coa alcaldesa de entón, María Loureiro, eran trasladadas de maneira intencionada á Delegación Territorial de Mar e Pesca. Unha práctica que, afirman, non respondía a criterios técnicos nin organizativos, senón á vontade de dar visibilidade política á entón delegada, garantindo a súa presenza na foto institucional e facendo un uso partidista dun cargo que debería ser estritamente institucional.

Na actualidade, subliñan, as reunións institucionais celébranse no Concello de Viveiro, “que é a casa de todos os veciños e veciñas”, e non nunha delegación empregada con fins políticos.

O PSOE lembra tamén que a actual alcaldesa chegou a intentar compatibilizar a Delegación de Mar e Pesca coa Alcaldía, algo que finalmente non foi permitido, o que —segundo indican— confirma o carácter político que se pretendía dar a ese posto.

O que consideran especialmente grave é que, dez meses despois da súa saída, a Xunta de Galicia non procedese aínda ao nomeamento dunha substitución estable, o que fai temer que este cargo siga a ser tratado como unha peza máis da estratexia partidista, en lugar de responder ás necesidades reais do sector pesqueiro e do territorio.

“A Mariña e a provincia de Lugo necesitan máis que nunca unha Delegación Territorial de Mar e Pesca centrada en traballar polo sector, non en servir de trampolín político nin de ferramenta de campaña. O que reclamamos é un delegado ou delegada XA, con compromiso institucional e co territorio”, sinalan desde o PSOE.

O Partido Socialista esixe á Xunta de Galicia que actúe con responsabilidade institucional, nomee de inmediato unha persoa cualificada ao fronte da Delegación Territorial de Mar e Pesca en Celeiro-Lugo —como ocorre noutras consellerías— e poña fin ao uso partidista dun cargo que debe estar ao servizo do sector mariñeiro e da veciñanza.