O PSdeG de Xove denuncia a privatización da xestión da auga aprobada polo goberno local

Advirten de que o estado das instalacións é “moi deficiente” e que o propio expediente prevé un investimento de arredor de 1,5 millóns de euros para melloralas

Xove, 21 de abril, 2026. O PSdeG de Xove denuncia que o goberno local do Partido Popular aprobou no pleno ordinario deste luns a proposta para privatizar a xestión municipal do abastecemento, saneamento e tratamento da auga. As e os socialistas cualifican a decisión de “gravísima”, ao considerar que pretende entregar a unha empresa privada un servizo básico e condicionar o futuro do Concello durante os vindeiros oito anos.

O Grupo Municipal Socialista votou en contra dunha medida que, ao seu xuízo, evidencia que o PP renuncia a asumir a xestión directa dun servizo esencial. Desde o PSdeG sosteñen que, tras vinte anos á fronte do Concello, o alcalde “pretende resolver as deficiencias do sistema non con planificación, investimento e xestión pública, senón apartándose das súas responsabilidades e deixando a auga en mans privadas”.

As e os socialistas advirten de que esta decisión “hipotecará” o Concello durante dúas lexislaturas completas e subliñan que o PP non incluíu esta proposta no programa electoral co que concorreu ás eleccións de 2023. Por iso consideran especialmente grave que se aprobase a un ano das municipais e sen abrir un debate previo coa veciñanza sobre o futuro da xestión da auga.

Desde o PSdeG sinalan tamén que o goberno local deixou ao descuberto a súa incapacidade para xestionar esta área, ao escudarse na falta de persoal e no mal estado das instalacións. Para a formación socialista, esta xustificación constitúe “a confesión dun fracaso político e de xestión” por parte do executivo.

Advirten ademais de que o modelo proposto prevé un forte incremento dos custos. Segundo explican, o prezo actual rolda os 400.000 euros anuais, mentres que a proposta do PP estima un gasto total próximo aos 5 millóns de euros nos vindeiros oito anos, o que supón unha media duns 550.000 euros ao ano. “A pregunta é moi clara: quen vai pagar isto? Pois, como sempre, acabarano pagando as veciñas e veciños de Xove”, denuncian.

O PSdeG subliña igualmente que o estado das instalacións é “moi deficiente” e que o propio expediente prevé un investimento duns 1,5 millóns de euros para melloralas. “A veciñanza vai pagar cos seus impostos o arranxo das infraestruturas e, despois, o Concello vai entregar a xestión a unha empresa privada para que obteña rendemento económico. Ese é o modelo do PP”, critican.

“O alcalde leva vinte anos no cargo sen resolver este problema e agora, a un ano das eleccións, saca da manga unha privatización que condicionará o futuro de Xove”, sostén o PSdeG, que lembra ademais que esta operación reproduce un modelo xa coñecido no municipio, como ocorreu coa privatización do servizo de recollida do lixo.

Por todo iso, o Grupo Municipal Socialista rexeitou a proposta e defendeu que “os servizos básicos non se privatizan para que outros fagan negocio co que paga toda a cidadanía. O que ten que facer un goberno responsable é asumilos, arranxalos e xestionalos ben, non quitarse de enriba os problemas e deixar que a factura a pague a veciñanza”.

Durante a sesión abordouse tamén a prórroga por un ano do servizo de recollida do lixo, un punto no que o PSdeG se abstivo, deixando clara a súa posición de que, se goberna en Xove, traballará para recuperar a xestión pública deste servizo.