O BNG aborda con especialistas o futuro urbanístico e residencial de Ribadeo

O portavoz municipal, Martín Graña, xunto aos arquitectos Roi García e Valerio González, falaron sobre os proxectos actuais e as alternativas que defende a formación a nivel local e galego. Graña: “A vivenda é un dereito básico e dende as administracións débense aplicar políticas valentes para garantir o acceso das familias e fixar poboación nos municipios”.

Ribadeo, 11 de xuño, 2026. O BNG de Ribadeo celebrou este xoves no local social de Piñeira unha charla-coloquio titulada “A vivenda en Ribadeo: solucións e alternativas”. O encontro, que reuniu unha notable asistencia de veciñas e veciños, serviu para analizar a situación actual do municipio en materia de vivenda e para expor a folla de ruta da formación nacionalista ante unha das principais preocupacións sociais.

A mesa estivo presentada polo portavoz municipal do BNG, Martín Graña, acompañado polos arquitectos Roi García e Valerio González. Ao longo da sesión, os relatores explicaron o estado e o procedemento dos proxectos urbanísticos en marcha en Ribadeo, analizaron as dinámicas do mercado inmobiliario e abordaron as dificultades ás que se enfronta a veciñanza —especialmente a mocidade— para desenvolver o seu proxecto de vida tanto na vila como nas parroquias.

Durante a súa intervención, Graña subliñou que o acceso á vivenda require unha atención prioritaria por parte das administracións. “Desde os concellos temos que fomentar e animar á administración autonómica a seguir un modelo que poña a vivenda ao servizo das persoas e non do beneficio duns poucos”, afirmou. Tamén insistiu na necesidade de que a Xunta de Galicia asuma o seu papel na creación dun parque público potente que contribúa a reequilibrar a situación actual. Ademais, destacou que é “fundamental manter informada con rigor á veciñanza de todas as actuacións que se están realizando ou se van realizar no municipio e que poden xerar trastornos no día a día”.

Pola súa parte, os arquitectos Roi García e Valerio González achegaron unha visión técnica sobre as estratexias urbanísticas en marcha e outras propostas para xerar solucións habitables. Ambos coincidiron na importancia de apostar por un crecemento equilibrado, poñendo en valor as potencialidades urbanas e rurais cun desenvolvemento ordenado e sostible que permita ofrecer alternativas viables e duradeiras.

O acto pechouse cun debate aberto no que as persoas asistentes puideron trasladar as súas dúbidas e preocupacións sobre este tema tan sensible. Desde o BNG cualificaron o encontro de Piñeira como “moi enriquecedor”, ao permitir explicar as súas propostas en materia de vivenda e seguir construíndo un proxecto de vila baseado na escoita activa das necesidades da veciñanza.