O Alcalde de Foz considera lamentables as declaracións do candidato socialista sobre a residencia de maiores, que demostra que non coñece a realidade do asilo nin deste novo centro

Foz, 20 de marzo de 2019. O alcalde de Foz, Javier Jorge Castiñeira, cualifica de lamentables e desafortunadas as manifestacións do candidato do PSOE á Alcaldía sobre a nova residencia de maiores. O rexedor engade que isto demostra que non coñece a realidade nin do asilo nin da nova residencia, como de moitos outros asuntos do municipio.
“Desde o equipo de goberno do Concello de Foz lamentamos as declaracións do señor candidato descoñecido do Partido Socialista en Foz. Parécenme desafortunadísimos os seus comentarios sobre a residencia de maiores, na que fixemos a xornada de portas abertas e en poucos días encheremos xa de residentes. Parécenos desafortunado tildar de electoralismo calquera expediente que, como neste caso, veña referido aos nosos maiores e a todo o persoal do asilo de anciáns. Este señor, que aparece única e exclusivamente para presentarse como candidato, descoñece absolutamente a realidade social, cultural e de todo tipo deste concello, posto que nunca participou en nada. E parece denigrante que veña agora aquí a deostar o traballo feito por tanta xente durante estes últimos anos: o traballo da Xunta de Galicia financiando con máis de 2,3 millóns de euros esa instalación, o traballo do equipo de goberno e doutros membros da corporación, especialmente o BNG e Foz Plataforma de Futuro, que fixeron o posible para que tanto os anciáns como o persoal non quedase sen servizos no asilo. Parece verdadeiramente lamentable que se banalice este asunto simplemente por electoralismo e por celos políticos dunha persoa que descoñece a realidade do noso concello”, explica Javier Castiñeira.
O rexedor recoméndalle “ao descoñecido candidato do Partido Socialista que se centre un pouquiño máis e que faga propostas, pero desde logo non vai facerse coñecido a conta dos traballos dos demais. Se este señor non apareceu no pobo nunca, nos trinta e pico anos que ten, e agora faino para única e exclusivamente buscar un futuro profesional e político que o diga claramente. Agora a conta do traballo dos demais non llo imos admitir”.