O SLG apoia a mobilización convocada por MODEPEN para este sábado en Ribadeo

A Mariña, 10 de febreiro, 2022. As persoas xubiladas de todo o Estado español van volver sair á rúa o próximo sábado día 12 de febreiro. Na Galiza, o Movemento Galego en Defensa das Pensións e os Servizos Públicos (MODEPEN) ten convocado dúas manifestacións: unha na sur, en Cangas do Morrazo, e outra no norte, en Ribadeo.

O Sindicato Labrego Galego comparte a reivindicación das organizacións convocantes de
revalorización das pensións coa referencia do “Índice de Prezos ao Consumo Anual Acumulado” (“IPC Acumulado”, ou “IPC Real”), co obxecto de garantir o mantemento do poder adquisitivo das pensións. Entendemos que calquer revalorización que fique por debaixo destas cuantías estaría a incrementar a brecha de desigualdade que provocaron as políticas neoliberais das ultimas décadas.

No caso das persoas xubiladas dos sectores agrarios e gandeiros na Galiza, que veñen percibindo pensións que na maior parte dos casos non superan o importe mínimo, a actualización das cuantías resulta imprescindíbel. Por outra parte, as dificultades engadidas para o acceso aos servizos públicos, a cada paso máis precarizados, que teñen as persoas xubiladas que viven no medio rural galego, agrava aínda mais a situación.

O SLG vai participar nestas mobilizacións como xeito de expresar a nosa solidariedade coas persoas xubiladas actuais, pero tamén para demandar un compromiso político explícito co sistema público de pensións para o futuro.