Reunida en Ribadeo a Mesa de Coordinación Institucional de Violencia de Xénero, que contou coa presenza do director xeral neste ámbito, Roberto Barba

Ribadeo, 25 de outubro de 2024. Hoxe no Concello de Ribadeo celebrouse a reunión da Mesa de Coordinación Institucional de Violencia de Xénero, coa participación de representantes de centros de ensino, do Centro de Información á Muller (CIM) e das Forzas e Corpos de Seguridade do Estado. A esta mesa asistiu Roberto Barba, director xeral de Loita contra a Violencia de Xénero en Galicia, que na súa intervención destacou a necesidade de reforzar os recursos na asistencia a vítimas de violencia machista.

Ademais, subliñou a importancia de visibilizar todas as iniciativas que se levan a cabo en materia de violencia de xénero. Tamén informou sobre as 26 actuacións gratuítas que a Xunta de Galicia en colaboración coa Fegamp ofrece aos municipios para combater a violencia, dispoñibles durante todo o ano e non só en novembro, entre as que se inclúe o programa Conectade@s, que foi concedido ao Concello ribadense.

Durante a reunión a concelleira de Igualdade, Begoña Sanjurjo, e a directora do CIM, Montserrat González presentaron as actividades realizadas no último trimestre e as programadas ata o peche do ano. A edil ribadense destacou “un amplo programa de ciberseguridade, enfocado na saúde mental e a violencia de xénero para adolescentes, que incluirá talleres e charlas coa participación de psicólogas como Olalla Guimarey, María José Garrido Antón e a asociación Aliade Ultreia”.

Sanjurjo explicou que “fixemos especial fincapé nunha charla que terá lugar a principios de decembro para familias que tratará sobre este tema. No ámbito cultural, para este trimestre programáronse actividades dirixidas aos máis pequenos, como contacontos, e obras de teatro de gran interese para público xeral, como A Cincenta que non quería comer perdices, a cargo de Sarabela Teatro. Esta obra, baseada no conto da escritora Nunila López Salamero, ofrece unha reinterpretación crítica do conto clásico, abordando temas de igualdade de xénero e cuestionando os estereotipos tradicionais. A través dunha narrativa orixinal, convida a reflexionar sobre a independencia e a liberdade de decisión das mulleres”.

Para Begoña Sanjurjo “as mesas de coordinación institucional, como a celebrada hoxe, xogan un papel fundamental na loita contra a violencia de xénero. Serven como espazos de traballo conxunto onde diferentes institucións coordinan esforzos, comparten información e establecen estratexias comúns para garantir unha protección máis eficaz das vítimas. Ademais, esta semana tamén se reuniu o Consello Municipal de Mulleres de Ribadeo para reforzar o compromiso do noso municipio na promoción da igualdade e a erradicación da violencia de xénero”.

E engadiu: “desde a Área de Igualdade seguimos traballando na coordinación e colaboración con todas as institucións implicadas, para garantir unha resposta integral e eficaz, apoiando sempre a prevención e a sensibilización desde todas as idades”.