A avenida da Mariña estará pechada ao tráfico con motivo das obras de Augas de Galicia no peirao de Burela

O corte de ambos os carrís comezará mañá, día 3 de setembro, e terá unha duración estimada dun mes, durante o cal estará permitido o acceso a garaxes, depuradora, estaleiros e dársenas de xeito puntual

Burela, 2 de setembro de 2025. O Concello de Burela informa de que a partir de mañá, mércores 3 de setembro, estarán pechados os dous carrís de circulación da avenida da Mariña. Este corte de tráfico foi solicitado por Augas de Galicia para continuar avanzando nas obras da rede de saneamento no peirao de Burela.

Con motivo dos traballos xa estaba pechado un dos carrís da avenida, pero agora xa non se poderá acceder á estrada debido a que o desenvolvemento da actuación en condicións de seguridade esixe empregar maquinaria que ocupa toda a vía.

Xa no proxecto inicial da obra estaban contemplados estes cortes de tráfico en varias fases. Este terá unha duración tota aproximada de un mes, ata que se chegue á fase seguinte.

Dende a dirección da obra van permitir de xeito puntual o acceso aos vehículos que precisen pasar de xeito imprescindible. Intentarase facilitar en medida do posible, sempre de xeito puntual, o acceso á depuradora, os estaleiros, as dársenas e, por suposto, aos garaxes das vivendas da zona.

“Dende o Concello de Burela rogamos a toda a xente que non teña que facer uso imprescindiblemente de ningún destes servizos que evite ir pola zona do peirao co seu vehículo”, sinala o concelleiro de Obras, Ramiro Fernández Rey.