Os populares cren que “hai que adaptar ás necesidades actuais ó acondicionamento das vivendas dos Castros, un proxecto do PP que recupera a alcaldesa de Burela despois de moitos anos paralizado polo seu propio partido”

Os populares tamén subliñan que “agora hai en Burela outras localizacións máis amplas que, negociando coas diferentes administracións, se poderían empregar para asociacións locais”

Burela, 18 de outubro de 2025. O PP de Burela lembra que “o acondicionamento das vivendas das antigas casas dos mestres na zona dos Castros para ceder ás diferentes asociacións” que anunciaba recentemente a alcaldesa “é un proxecto que leva o selo do Partido Popular”.

No seu día, o goberno do PP xa acondicionara estas vivendas para ese obxectivo e, cando entrou a gobernar o PSOE, no 2015 ese proxecto quedou totalmente paralizado e non se cederon as vivendas que xa foran acondicionadas da man dun obradoiro de emprego financiado pola Xunta de Galicia.

Os populares celebran que “a señora López tivera a ben recuperar este proxecto do Partido Popular e asumilo como propio” a pesar de que pasara o tempo. Pero, precisamente, porque pasou o tempo dende o 2015, “a situación cambiou bastante”. Os concelleiros apuntan específica aos problemas de vivenda que vemos tódolos días e Burela é un concello que, a diferenza doutros, non dispón de vivendas sociais para que os veciños e veciñas que o precisen poidan acceder a elas.

Dende o PP subliñan que “non queremos dicir que todas esas vivendas da zona dos Castros deban ser dirixidas a este obxectivo, pero si que consideramos que se debería reservar algunha das vivendas con fins sociais”. Ademais, consideran que “en Burela hai agora outras localizacións que, negociando coas diferentes administracións, se poderían empregar para asociacións locais que serían bastante máis amplos que as vivendas dos Castros e que darían a posibilidade de desempeñar de forma máis cómoda ás asociacións da nosa vila”.

Os populares cren que “o proxecto que xa puxo en marcha a nosa formación no pasado e abandonada polo PSOE debe ser recuperado, pero parcialmente porque as necesidades mudaron ao longo do tempo”, conclúen.