O PP de Foz destaca “o seu labor de fiscalización e demostra que o suplemento de crédito podía dividirse en tres bloques”

O voceiro popular, Javier Castiñeira, subliña que o rexedor acabou recoñecendo no pleno que o PP “dicía a verdade” cando afirmaba que o suplemento podía dividirse en tres bloques

Foz, 28 de novembro de 2025. O Partido Popular de Foz manifesta a súa satisfacción por ter cumprido co seu deber de fiscalizar a acción do goberno local e por deixar en evidencia, no pleno celebrado onte, a mala xestión económica do alcalde en relación ao suplemento de crédito de máis de 1,3 millóns de euros.

O voceiro popular, Javier Castiñeira, subliña que o rexedor acabou recoñecendo no pleno que o PP “dicía a verdade” cando afirmaba que o suplemento podía dividirse en tres bloques, tal e como viña defendendo o grupo popular desde o inicio.

Castiñeira explica que o PP está satisfeito non só por exercer o seu labor de fiscalización, senón tamén por lograr que o alcalde admitise publicamente que as subvencións e convenios ás asociacións e clubes podían e debían aprobarse antes, nun expediente separado; e que as facturas de 2024 con reparos e as facturas de 2025 sen informar constituían bloques distintos que Cajoto decidiu mesturar deliberadamente co das entidades para xerar presión política.

“É evidente que o alcalde atrasou os pagos ás asociacións e clubes por interese político, para usar ese bloque como ferramenta de presión”, afirma Castiñeira

O PP acusa ao rexedor de empregar ás entidades culturais, deportivas e sociais como escudo político para forzar a aprobación dos bloques máis “irregulares”.

Segundo o popular, “o BNG non foi capaz de aguantar ese presión nin esa chantaxe, e acabou facilitando que o alcalde sacara adiantes os bloques máis polémicos”.

O voceiro do PP lembra que ao Partido Popular se lle ofreceron opcións semellantes ás que recibiu o BNG, pero que os populares non aceptaron porque “a xestión con irregularidades non é moeda de cambio”.

“Queremos que os empresario cobren e que as entidades perciban o que lles corresponde, pero queremos tamén que as cousas se fagan ben”, asegura Castiñeira.

O Partido Popular conclúe que seguirá exercendo unha fiscalización rigorosa: “O noso deber é fiscalizar, poñer evidencias enriba da mesa e impedir que se normalicen irregularidades. Ese é o noso compromiso e non imos renunciar a el”.