A Deputación publicará por primeira vez o BOP electrónico o 3 de xaneiro

Nota de prensa:
A Deputación publicará por primeira vez o BOP electrónico o 3 de xaneiro grazas ó Innova-TE

– O persoal deste servizo comezou a recibir hoxe a formación necesaria para editar o novo Boletín da Provincia, que ten unha media de 7.000 anuncios anuais

– É un paso moi importante dentro do programa tecnolóxico e permite un aforro global de 400.000 euros ó ano

– O novo sistema permitirá ós anunciantes publicar anuncios e pagar a taxa correspondente por internet, sen desprazamento algún á Deputación e con plena validez legal, aínda que tamén estará permitido o sistema tradicional de entrega de documentación no Rexistro de entrada

– Para temas funcionais e administrativos, os interesados poderán chamar e contactar co propio servizo provincial do BOP nos teléfonos 982 26 01 20, 982 26 01 24, 982 26 01 25, 982 26 01 26; ou no enderezo electrónico: boletin@deputacionlugo.org

A Deputación iniciou este luns a formación para o persoal do negociado do Boletín Oficial da Provincia (BOP), que se publicará por primeira vez o 3 de xaneiro en formato electrónico, cumprindo o calendario marcado polo organismo provincial. A Deputación continúa avanzando na implantación da administración electrónica grazas ó Innova-TE, o programa máis ambicioso de toda a Galicia tanto por presuposto como por prazos: 9 millóns de euros, co-financiados nun 70% por fondos FEDER, para que en menos dun ano esté a pleno rendemento a e-administración en toda a provincia.

Trátase dun paso máis que lle permite aforrar ó organismo provincial 400.000 euros anuais. O Boletín ten unha media de 7.000 anuncios ó ano, polo que o novo sistema permitirá simplificar o volume de información, así como o seu trámite administrativo, xa que tanto a inserción de anuncios ou o pago das taxas, como o rexistro das mesmas, poderase facer vía telemática, así como o seu seguimento, publicación definitiva e consulta.

Cartas do Presidente

Para que o novo sistema de pago sexa posible, a Deputación aprobou no Pleno de novembro a ordenanza que dá validez legal a este procedemento. Asimesmo e diante o inminente cambio de formato, o Presidente, José Ramón Gómez Besteiro, enviou unha carta a todos os subscritores anunciándolles que a principios de mes o Boletín deixará de facerse en formato papel. Con todo, informou que aquelas persoas ou institucións que teñan pagado algún mes máis de subscrición seguirano recibindo ata a extinción do seu contrato.

Co novo sistema, publicar no BOP documentación oficial ou particular será máis sinxelo e rápido, xa que non requerirá de desprazamentos e aforrará ós usuarios tempo e cartos. Gomez Besteiro tamén comunicou por carta ós anunciantes frecuentes no BOP os pasos a seguir co novo sistema, que ten todas as garantías legais. Son os seguintes: entrar na web: www.deputacionlugo.org e pinchar “Carpeta do Cidadán”; introducir o DNI electrónico ou, en caso de non telo, haberá que rexistrarse introducindo os datos persoais; seleccionar “Inserción dun anuncio no BOP”; e, finalmente, cubrir o formulario e adxuntar o anuncio en formato word. En todo momento, poderá consultarse o estado do trámite dende a “Carpeta do Cidadán”.

Para temas funcionais e administrativos, os interesados poderán chamar e contactar co propio servizo provincial do BOP nos teléfonos 982 26 01 20, 982 26 01 24, 982 26 01 25, 982 26 01 26, ou no enderezo electrónico: boletin@deputacionlugo.org.

Procedemento de inserción de anuncios no BOP

O cambio de sistema implica que os usuarios, a partir do 3 de xaneiro, poderán empregar a pasarela de pago telemática para facer a inserción dos anuncios. Os cidadáns só terán que dispoñer dun ordenador, conexión a Internet e estar en posesión do DNI electrónico. Os pasos a seguir para realizar este proceso son os seguintes: entrar no apartado Inserción de anuncios no BOP con pago telemático, onde aparecerá un icono específico para esta función. Pinchando neste apartado, o cidadán poderá escoller o modo de pago. A continuación, terá que cubrir os datos e dar a conformidade. Concluído o proceso, o usuario estará en condicións de poder descargar o xustificante de pago.

A Deputación manterá ademais a vía tradicional das publicacións no BOP, presentando no Pazo de San Marcos o anuncio en papel e tamén o arquivo electrónico en word gravado nun CD ou DVD, acompañando a solicitude de inserción correspondente asinada pola persoa autorizada, así como o pago da taxa bancaria. Deste xeito, o organismo provincial mellora o servizo ofrecido ata o de agora ós cidadáns. Será un procedemento moito máis áxil, cómodo, profesional e moderno, grazas á administración aberta os 365 días do ano e as 24 horas do día.

Máis formación sobre a e-administración

A Deputación tamén continúa coa formación in situ, práctica e personalizada, continua e gratuíta nos 51 Concellos que se adheriron voluntariamente ó Innova-TE. 7 técnicos do organismo provincial explican mediante casos prácticos e reais os procedementos a seguir sobre os 80 trámites administrativos que os municipios poderán realizar mediante a Rede. Con este sistema, a Deputación é a primeira administración galega que opta por crear grupos de traballo permanentes para garantir a formación na e-administración. Ademais, o organismo provincial acolleu no mes de setembro o curso que impartiu en Galicia o instituto INTECO sobre a utilización, a seguridade e os beneficios que ofrece o DNI electrónico á hora de relacionarse telematicamente coa administración.

Este curso, no que participaron traballadores da Deputación e dos Concellos, PEMES, Colexios Oficiais e cidadáns en xeral, foi a primeira oportunidadade na Comunidade para recibir formación a custe cero sobre o manexo da administración sen papel por parte do instituto dependente do Ministerio de Industria.