Restablecida a circulación peonil na ponte de Arante o alcalde de Ribadeo pide á Deputación que remate as obras

Nota de prensa:
NAS VINDEIRAS HORAS QUEDARÁ RESTABLECIDA A CIRCULACIÓN PEATONAL NA PONTE DE ARANTE. FERNANDO SUÁREZ PÍDELLE Á DEPUTACIÓN QUE REMATE O ANTES POSIBLE AS OBRAS, DEBIDO Á SITUACIÓN EXTREMA QUE ESTÁN A SOFRIR MOITOS VECIÑOS DE RIBADEO E DE TRABADA.

Ribadeo, 3 de marzo de 2011. Nas próximas horas quedará restablecida a circulación peatonal na ponte de Arante. Será a través dunha ponte peatonal, segundo ven de anunciar o alcalde, Fernando Suárez. O rexedor pídelle á Deputación que remate o antes posible as obras, debido á situación extrema que están a sofrir moitos veciños de Ribadeo e de Trabada.

Suárez Barcia dixo que “no día de hoxe, entre esta tarde e mañá, quedará restablecida a circulación peatonal a través dunha pasarela en precario, que se está a poñer alí no lugar da ponte. Trátase dunha pasarela, ao meu modo de ver, un pouquiño escasa de máis. En todo caso si é unha cuestión transitoria e lles serve aos veciños da Ponte de Arante para evitar dar un rodeo enorme á hora de que poidan deixar o coche aparcado nunha banda, cruzar andando e ir ás súas vivendas, benvido sexa si se van arreglando así nas vindeiras semanas”.

O alcalde apelou á Deputación “para que canto antes non esgote os seis meses que ten de prazo a empresa adxudicataria desta obra para realizala, xa sei que milagros non se poden pedir, pero que fagan o posible para que estea lista antes dese período, dado que é unha situación extrema a que están a sofrir non só eses veciños senón tamén xentes doutras parroquias de Ribadeo e de Trabada”. Fernando Suárez lembrou que “teñen problemas para circular con maquinaria pesada e preocúpame moitísimo o transporte escolar polo rodeo que ten que dar indo por sitios perigosos. Confío en que as obras avancen, porque xa se desmontou toda a ponte estropeada e agora estánse a facer as zapatas e os estribos que darán lugar a contar cunha nova infraestructura en Arante”.