Espazo Ecosocialista incorpórase á Plataforma SOS Sanidade Pública e asegura que tras os ataques agóchanse intereses económicos privados

EcoGaleguistas asegura que tras os ataques á sanidade pública acóchanse intereses económicos privados
Espazo Ecosocialista incorpórase á Plataforma SOS Sanidade Pública e
apoia a mobilización do domingo 3 de xuño en Santiago de Compostela
Espazo Ecosocialista (Ecogaleguistas) vemos con moita preocupación que tanto o
goberno central do Estado como o da Xunta de Galicia teñan tomado unha serie de
medidas lexislativas que atinxen á cidadanía de Galicia, que polas súas características
económicas, sociais e demográficas, van agravar de especialmemte a situación
sanitaria da poboación, así como a repercutir no empeoramento do propio “estado de
saúde” da mesma.
Os criterios polo que manifestamos o anterior baséanse no seguinte:
– Os orzamentos dedicados a sanidade teñen baixado de maneira
importante nos 3 anos de mandato do goberno de Núñez Feijoo
– O investimento en infraestrutura sanitaria é moi deficitario, acudindo á
financiación pública-privada que fai triplicar o custe dos investimentos co
lucro de entidades privadas
– A Anulación do Plan de Mellora para Atención Primaria provocou a perda
dun número importante de profesionais sanitarios
– O re-pagamento das receitas por parte dos pensionistas ademais de rachar
a unidade do aseguramento único, resulta especialmente gravoso para a
poboación maior de 65 anos que ten unha pensión media das máis baixas do
estado, cunha cantidade que ronda os 600 Euros. O decreto que limita/prohíbe
o acceso ás prestacións universais e de balde do sistema público a parados
de longa duración. Ao anterior hai que sumarlle unha taxa de 10 euros pola
renovación da tarxeta sanitaria.
– A lexislación dun novo recorte nos dereitos sanitarios que afecta a
sectores afectados por graves problemas de saúde como son as persoas
con amputacións, cancros,parálises, minusvalías graves e incapacitantes que
terán que adiantar o custe dos materiais ortoprotésicos ou pagar o transporte
sanitario, incluso o transporte con carácter de urxencia sanitaria.
– Autorizar o peche das oficinas de farmacia naqueles lugares onde non
exista PAC. Medida que supón un esforzo económico e social engadido nun
territorio con alta dispersión xeográfica e onde os medios de transporte público
non cobren ou o fan de xeito moi precario a nosa xeografía.
– Peche de centros de saúde e supresión de prazas de médicos en centros
de saúde e ambulatorios
Todas estas medidas e algunhas outras, non van servir nin para aforrar, nin para
superar unha crise económica da que os verdadeiros responsables están saíndo
indemnes (cando non, premiados con copiosas e contiosas indemnizacións de
agradecemento ‘polos servizos prestados’) e a inmensa maioría dos cidadáns temos
que sufrir as consecuencias.
O diñeiro público que temos aportado tódolos contribuíntes para axudar á banca
equivale ao 11,5% do PIB anual, e segundo os datos oficiais o “suposto burato
da sanidade” polo que se están a xustificar estes recortes é só do 1,6% do PIB.
Consideramos estas medidas moi inxustas e insolidarias, e sobre todo nunha nación
como Galicia cunha situación socio/económica marxinada, o que se traduce nun
auténtico “golpe de estado” a un modelo sanitario universal, solidario e equitativo como
o actual. Pensamos que o dereito a protección da saúde pasará de ser un dereito
básico das persoas a se converter nun negocio no que son moitos os
estamentos públicos e empresas privadas actuando con complicidade e alevosía
para pór por riba dos intereses públicos, os que dictan os seus petos.
Por todo o exposto, Espazo Ecosocialista (Ecogaleguistas) manifesta o seu
firma e irrenunciable apoio á sociedade organizada que se vén mobilizando a
prol da Sanidade Pública en Galicia representada por SOS Sanidade Pública e
que ten convocada una manifestación o día 3 de xuño en Santiago de
Compostela en defensa da Sanidade Pública.
+ Info: www.ecogaleguistas.org