O alcalde de Barreiros anuncia que o xulgado decidiu o arquivo da causa pola concesión de 44 licencias de obra

SATISFACCIÓN DE ALFONSO FUENTE DESPOIS DE COÑECER O ARQUIVO DA CAUSA ABERTA CONTRA ÉL, CONTRA A XUNTA DE GOBERNO LOCALE CONTRA A ARQUITECTA MUNICIPAL POLA CONCESIÓN DE 44 LICENCIAS DE OBRA NO ANO 2006.

Barreiros, 5 de outubro de 2012. O alcalde de Barreiros, Alfonso Fuente, amósase satisfeito despois de coñecer que o xulgado de instrucción nº1 de Mondoñedo decidiu arquivar a causa aberta contra o propio rexedor, os tres concelleiros que formaban parte da xunta de goberno local no 2006 e a arquitecta municipal, pola concesión de 44 licencias de obras para construir dunhas 3.100 vivendas.

Fuente Parga dixo que “nós desde o primeiro día o que tentamos foi defendernos, defender a nosa transparencia na concesión de licencias e baseándonos nos informes que tiñamos diante. Este proceso estaba aberto e nos satisface este arquivo e sobreseimento”. O rexedor engadiu que “esperaremos para ver si se recurre esta resolución por parte dos personados. Agardamos ansiosos o arquivo definitivo do caso”.

O alcalde de Barreiros engadiu que “é un tema desagradable que ás veces temos que pasar os políticos, por denuncias coma ésta presentada pola Axencia da Legalidade Urbanística cando gobernaba o bipartito na Xunta. Desgraciadamente ás veces hai que pasar por estes trances”.

O rexedor engadiu que “todos os membros da xunta de goberno e eu mesmo estamos moi contentos con esta resolución e todos aqueles falaron tanto de nós gustaríame que tamén agora falasen. Si teñen algo que decir que o digan agora que hai unha resolución xudicial. Nos respetamos á xustiza sempre, sexan as resolucións e as sentencias nun sentido ou noutro”.