A cabalgata dos Reis Magos percorrerá todas as parroquias de Lourenzá

PAPA NOEL ESTARÁ EN LOURENZÁ HOXE, VERNES, E O DOMINGO. A CABALGATA DOS REIS MAGOS PERCORRERÁ TODAS AS PARROQUIAS DO MUNICIPIO O DÍA 5 DE XANEIRO DENDE AS CATRO DA TARDE.

Lourenzá, 21 de decembro de 2012. A Concellería de Educación, Cultura e Turismo de Lourenzá acaba de facer pública a programación de actividades para as vindeiras datas de Nadal. Entre os actos previstos destaca a visita de Papá Noel hoxe e o domingo e a Cabalgata dos Reis Magos, que nesta ocasión percorrerá todas as parroquias do municipio.

A concelleira Lupe Flórez anunciou que a programación “comezará hoxe venres, 21 de decembro, coa visita de Papá Noel ás instalacións do Centro de Día ás cinco e media da tarde. Alí as nenas da sección de canto e pandeireta da escola municipal de música e danza Osorio Gutiérrez interpretarán unhas panxoliñas aos usuarios do centro. Posteriormente, sobre as seis da tarde, Papá Noel estará no punto de atención á infancia (PAI) Meniños. O domingo, 23 de decembro, Papá Noel achegarase ás dependencias da Casa do Concello, concretamente como é tradicional nos últimos anos estará na sala de exposicións da Casa da Cultura, onde ás cinco e media da tarde escoitará as últimas peticións dos máis novos do concello e entregaralles unhas lambetadas. De seguido, sobre as seis e media da tarde no salón de actos, os alumnos da sección de música, canto e pandeireta da escola municipal de música e danza Osorio Gutiérrez farán un recital cunha selección de cantos de Nadal”.

Flórez tamén explicou que “ao longo dos días 26, 27 e 28 de decembro, e 2, 3 e 4 de xaneiro, os nenos e nenas poderán gozar das vacacións asistindo aos obradoiros de temática típicos de Nadal, abelorios, coreografías, playbacks, xogos de mesa e de interior nas dependencias da Casa da Xuventude en horarios de mañá e tarde”.

E rematarán os actos da programación de Nadal organizada polo Concello de Lourenzá “co broche de ouro, que será na xornada do sábado, 5 de xaneiro, coa celebración da tradicional Cabalgata de Reis, que terá variacións respecto a anos anteriores. A novidade é que percorrerá as parroquias do noso concello. Empezará ás catro da tarde na igrexa parroquial de San Adriano, onde as súas maxestades asistirán ao recital de panxoliñas de Nadal a cargo do coro parroquial de Vilanova. De seguido, sobre as catro e media tarde, iniciarán o percorrido na súa carroza. Saudarán, nunha breve parada, aos veciños de Santo Tomé, diante da igrexa parroquial, para continuar ata o centro social de San Xurxo, onde de novo farán un alto no camiño para saudar aos veciños e veciñas presentes. Finalmente chegarán a Vilanova, onde sobre as seis da tarde iniciarán no albergue de peregrinos, situado na Praza da Gracia, o tradicional percorrido polas rúas da vila ata a Casa do Concello. Alí darán o seu discurso dende o balcón das oficinas municipais para o público que estará na praza do Conde Santo e posteriormente recibirán a tódolos nenos e nenas na escalinata principal e entregaranlles algún agasallo e lambetadas. Ao remate contaremos cun espectáculo de maxia a cargo do mago Pei no salón de actos da Casa da Cultura”, anunciou a concelleira de Cultura.

Lupe Flórez tamén deu a coñecer outras actividades que se van desenvolver este Nadal en Lourenzá aínda que non son organizadas directamente polo Concello. Referiuse a unha obra teatral “a cargo dos membros da asociación Conde Santo, de Lourenzá, que van retomala despois de dez anos, cando eran apenas uns rapaciños e que estiveran ensaiados pola técnica de Cultura municipal. Trátase da obra de carácter popular coñecida como Menciñeiro á forza, que representarán o día 30 deste mes no salón de actos da Casa da Cultura en dous pases: un ás cinco e media da tarde e outro ás nove da noite”. Tamén anunciou que “xa con carácter máis relixioso o cura párroco de Vilanova vai celebrar o 24 de decembro ás doce da noite a tradicional Misa do Galo na igrexa de Nosa Señora de Valdeflores, en Lourenzá”.