Concello de Burela e Gaia organizan unhas charlas esta semana sobre o aforro de enerxía no CEIP Virxe do Carme

ALUMNOS DO CEIP VIRXE DO CARME ASISTEN ESTA SEMANA A CHARLAS SOBRE O AFORRO DE ENERXÍA NOS CENTROS DE ENSINO E TAMÉN NOS SEUS FOGARES. A ACTIVIDADE ESTÁ ORGANIZADA POR GAIA E A CONCELLERÍA DE MEDIO AMBIENTE.

Burela, 28 de xaneiro de 2013. Durante esta semana os alumnos de 3º, 4º, 5º e 6º de primaria do CEIP Virxe do Carme participan en actividades programadas polas monitoras do Centro de Educación Medioambiental Gaia en materia de
educación ambiental, concretamente nunha charla sobre o aforro de enerxía nos centros de ensino e nos seus fogares.

A concelleira de Medio Ambiente, Patricia López Eijo, explicou que “a través destas charlas preténdese dar algunhas sinxelas pautas de comportamento que, aínda que se realicen no ámbito individual, poden ter unha enorme repercusión na busca da sostibilidade, sobre todo se son asumidas por un número crecente de persoas. O obxectivo desta actividade é contribuír ao coñecemento que todos e todas debemos ter sobre como actuar dende as
nosas actividades cotiás no colexio, na casa, etc”.

No día de hoxe desfrutaron da charla os os alumnos de 3º. Nestas charlas explícaselles aos rapaces que é a enerxía, en qué utilizamos a enerxía, a procedencia das diferentes fontes de enerxía e os tipos de enerxía existentes (renovables e non renovables, e as súas diferencias). A actividade remata con hábitos diarios de consumo, “xa que hoxe, máis ca nunca, é necesario acoller propostas de actuación que nos afasten do consumismo e que nos acheguen a escenarios onde a calidade de vida de todos os seres vivos do planeta sexa compatible coa súa preservación para as xeracións futuras”, engadiu López Eijo.

A edil de Medio Ambiente dixo que “si facemos un bon uso da enerxía eléctrica seguindo uns consellos,axudaremos a reducir a contaminación e as emisións dos gases responsables do efecto invernadoiro: apagar sempre a luz cando saímos dunha habitación; non ter os aparatos eléctricos acesos si non os estamos usando
como o ordenador ou o cargador do móbil; non abrir a neveira máis veces que as necesarias; aproveitar sempre que se poida a iluminación natural, etc”.

E engadiu que “no colexio tamén se consume enerxía, que moitas veces malgastamos, por exemplo deixando as luces acesas cando nos vamos para o patio ou ter as luces acesas nas clases cando podemos aproveitar a luz
natural”.