Besteiro aposta por un PSdeG “claramente galego con máis peso no proxecto socialista de España”

O aspirante á secretaría xeral presentou hoxe o seu proxecto en Viveiro ante a militancia da Mariña coa intención de facer que o partido en Galicia traballe “cun rumbo político común co PSOE” pero sexa “autónomo no seu funcionamento” e “sen tutelas na súa capacidade de decisión”

José Ramón Gómez Besteiro, aspirante á secretaría xeral do PSdeG, reuniuse esta tarde noite cos militantes da comarca da Mariña na sede do partido en Viveiro para presentar o seu proxecto de partido, escoitar as aportacións da militancia e respostar preguntas sobre o modelo orgánico e político. Gómez Besteiro transmitiu a súa aposta por un PSdeG “claramente galego”, que sexa “autónomo no seu funcionamento” e “sen tutelas na súa capacidade de decisión”, pero “que comparta un rumbo político común co PSOE”.

“É máis, eu defendo un PSdeG con cada vez máis peso no proxecto socialista de España, disposto a facer da nosa singularidade como país un valor e capaz de afrontar retos propios con solucións propias”, afirmou. Deste xeito, destacou que “non se pode obviar que Galicia ten problemas e retos propios”, poñendo exemplos como a despoboación ou o envellecemento, “e tamén unha cultura e unha realidade social única que hai que defender desde a cercanía e o coñecemento”. Tamén incidiu na necesidade de “facer pedagoxía” e “transmitirlle á xente da Mariña que tamén lle inflúen os problemas de Pontevedra, ou falar en Ourense dos retos de Ferrol, porque se a todos nos vai ben, a Galicia iralle ben”.

A esta característica, a de ser claramente galego, engadiu a necesidade de construír un PSdeG “renovador, integrador e cada vez máis grande, para recuperar a confianza da cidadanía”. Para esa renovación, o socialista aposta por fomentar a “rexeneración democrática a calidade política e máis participación activa dos militantes”, a través de medidas de transparencia e un regulamento de Código Ético cuxas características xa vén adiantando nas reunións coa militancia nas últimas datas. Tamén aposta por “aproveitar a intelixencia colectiva” para formar “un liderado compartido” que sexa “a referencia de toda a xente progresista de Galicia”. Gómez Besteiro, que continúa co seu percorrido por todas as comarcas galegas, destaca que ese liderado debe “saber recoller a forza de todos” para engrandecer o partido. “Non somos suficientes, e xusto cando a sociedade necesita máis, non podemos ofrecer menos”, destacou.