Miguel Gómez Crespo resulta vencedor da VI Volta Ciclista ás Comarcas de Lugo, cun claro dominio do equipo galego do Froiz

O Incio, 2 de maio de 2013. O vicepresidente nacionalista da Deputación de Lugo e delegado de Benestar Social e Deporte, Antonio Veiga, entregou esta mañá no Incio o maillot branquiazul que acredita como vencedor da VI Volta Ciclista ás Comarcas de Lugo ao corredor do equipo Froiz, Miguel Gómez Crespo. Estivo seguido na xeral individual polos irmáns Vicente e Raúl García de Mateos, segundo e terceiro respectivamente, aínda que ambos competindo para diferentes equipos. Na xeral por equipos, o claro dominador foi o equipo galego do Froiz.

Tamén un corredor do Froiz foi quen acadou o primeiro posto de corredores nacionais galegos, Martín Lestido Rey, quen tamén foi o gañador da clasificación final sub-23.

A VI Volta Ciclista ás Comarcas de Lugo é unha proba que conta co patrocinio principal da Área de Deporte da Deputación de Lugo, posta en marcha desde esta institución, coa organización do Club Ciclista Cidade de Lugo, coa finalidade de revitalizar o deporte do ciclismo nas comarcas lucenses e á vez servir de escaparate turístico a prol dunha dinamización económica de todas as comarcas do noso territorio. Segundo a Federación Española de Ciclismo, é a mellor proba do estado da categoría Elite-sub23, a “segunda” división do ciclismo, ás portas do circuíto profesional.