Os primeiros bolseiros do Plan de Fomento do Emprego Xuvenil inician as súas prácticas no Concello de Cervo

Cervo, 29 de xuño de 2013.- A Concellería de Emprego, que dirixe Yolanda Pedreira, informa de que este luns comezarán a súa formación os primeiros bolseiros beneficiarios do Plan de Fomento do Emprego Xuvenil. Uns mozos que inician as súas prácticas remuneradas en distintos departamentos do Concello e en empresas locais. En concreto son catro os primeiros titulados universitarios e de FP que participan neste programa no que o Concello inviste este ano 35.000 euros.

Unhas prácticas que se prolongarán durante tres meses, tempo no que realizarán tarefas relacionadas cos departamentos municipais e as empresas aos que foron asignados. Neste caso, varios titulados formaranse nos departamentos de Deportes e Medio Ambiente mentres un deles realizará as prácticas en Alrogal. Á hora de designar os servizos municipais onde facer as prácticas, o departamento de Emprego tivo en conta os casos particulares de cada mozo, especialmente a súa formación e as saídas profesionais da súa titulación tentando tamén adecuarse ás súas preferencias “co obxectivo de que lle poidan sacar o máximo proveito ao seu período formativo” explica Pedreira.

Este grupo de mozos son os primeiros en acollerse ao Plan de Fomento do Emprego, pero o Concello explica que paulatinamente se irán incorporando máis titulados para que todas as persoas que cumpren os requisitos para acollerse ao plan poidan participar. Unha entrada gradual que busca “que a formación que reciban sexa de calidade” engade a edil.

Ao mesmo tempo, a delegación de Emprego lembra que o Concello ten a intención da darlle continuidade a este plan e xa traballa para incluír unha partida no orzamento do ano que vén para seguir outorgando máis bolsas. Hai que destacar que a administración local financia ao 100% as bolsas dos titulados que realizan prácticas nos departamentos municipais, mentres no caso dos convenios con entidades privadas o Concello achega o 50% e a empresa receptora o 50% restante. Ademais, a Fundación Empresa-Universidade Galega (FEUGA) tamén colaborou na posta en marcha do programa.

Cabe lembrar que este programa está dirixido a titulados universitarios ou de FP do sistema público educativo de Galicia empadroados en Cervo, menores de 30 anos no caso de titulados de FP e menores de 31 no caso de persoas con estudos universitarios. Ao mesmo tempo, entre os requisitos tamén se atopa que teñan pasado menos de 3 anos dende a obtención do título e que non teñan desempeñado un traballo profesional remunerado relacionado coa súa titulación.