O Pleno burelés ratifica a proposta de Barcia de fraccionar o pago do IBI para 2014

Burela, 11 de outubro de 2013. O pleno do Concello burelés ratificou na sesión celebrada este xoves a proposta do alcalde, José María González Barcia, de fraccionar o pago da contribución urbana para 2014. Deste xeito, os recibos domiciliados abonaranse ó cincuenta por cento o cinco de xuño e o cinco de outubro. O alcalde burelés afirmou que “Burela é o terceiro concello da provincia co tipo impositivo máis baixo, o 0’42%; por debaixo só quedarían O Incio e Xermade. Pero por riba están concellos coma Foz, co tipo situado no 0’66%; Viveiro, preto do 0’8%; ou Ribadeo no 0’85%”.

Ademais, os votos do PP foron suficientes para sacar adiante a concesión de subvencións para o presente exercicio 2013. Os populares afirman que a realidade é a que é, e que este ano non se poden conceder máis fondos para subvencións. Desde o equipo de goberno critican a postura dos socialistas,q ue se abstiveron: “demostraron un enorme cinismo reclamando a concesión de subvencións cando foron eles os que as retiraron xa en 2009”. Igualmente, desde as filas populares afirmaron que “Alfredo Llano politicamente é un irresponsable con elevadas doses de cinismo: critica que o Concello de Burela conceda subvencións nominativas, dentro do marco legal establecido polo propio Concello, cando a Deputación de Lugo concede subvencións nominativas a destro e sinistro sen ningún tipo de criterio e dando contías totalmente discrecionais. Llano debería de explicar por qué a Deputación concede subvencións a certas entidades para que estas contraten a persoal afín ó PSOE. Entendemos que a credibilidade de Llano é cero, dado que non se pode pedir que outros fagan o que un nin fai nin fixo. Intolerable”.

Tamén os votos do PP serviron para aprobar o marco orzamentario para os próximos tres anos. “A regra de gasto cúmprese neste ano en que estamos e cumprirase en 2015 e 2016. Teremos problemas en 2014, dado o control de gasto que fixemos en 2012”, afirmaron desde o equipo de goberno.
No tocante ás mocións, os populares aprobaron todas as mocións presentadas polo seu grupo: a referente ó incremento da cota de captura da pescada foi aprobada por unanimidade. O PP aprobou tamén cos seus votos a moción que rexeita a trama de asesores montada polo BNG na Deputación.

Sobre a moción popular solicitando á Deputación que cumpra cos seus compromisos legais en relación co servizo de axuda no fogar básico, a segunda tenente de alcalde Diana Durán manifestou que “a Xunta cumpre coas súas competencias en materia de axuda á dependencia, pero a Deputación incumpre as súas no que se refire á axuda no fogar básico, o que nos obriga a facer un esforzo engadido”. Durán engadiu que “o bipartito burelés, por falla de xestión, deixou de gastar 90.000 euros en axuda no fogar á dependencia, que tiveron repercusión directa neste ano e no anterior”. Ademais, indicou que “o Sr. Llano non pinta nada na Deputación, agás o papel de deputado-correo, para transmitir papeis e recadiños. Llano debería preocuparse máis por demandarlle á Deputación o mesmo que lle pide á Xunta en materia de servizos sociais, é dicir, fondos para cumprir coa Lei de Servizos Sociais que o bipartito da Xunta aprobou en 2008”.

Outra moción aprobada cos votos do PP, e coa abstención do PSOE, foi a relativa ó tratamento dos pacientes de oncoloxía no Hospital da Costa. O PP, a través de Diana Durán, afirmou que “quedan en entredito aqueles que afirmaban que se ía desmantelar o Hospital de Burela, e que se perderían servizos. A área de xestión integrada vai traer melloras para o Hospital: hospitalización a domicilio, tratamento de pacientes oncolóxicos con quimioterapia básica, e o plan director do centro sanitario, básico de cara á ampliación do Centro”.

Os populares pedíronlle ó PSOE que retirase unha enmenda ó respecto, xa que, segundo dixo Diana Durán, “a abstención socialista é un non ó servizo de oncoloxía básica no Hospital, un non que da as costas ós veciños e que só serve como arma política contra a Xunta de Galicia. Semella que o Sr. Llano pide coidados paliativos e hospitalización a domicilio; as súas fontes de información dentro do hospital non o deben informar ben, porque seguramente que non se fían moito del, porque coidados paliativos xa os hai, e a hospitalización a domicilio se está a poñer en marcha estes días. Aínda que xa nos ten acostumados a estas cousas, porque sendo alcalde anunciou con toda solemnidade, por dúas veces, investimentos de sete millóns de euros para ampliar o hospital por parte da Xunta bipartita, e nada de nada fixeron. Iso sí, cobra da Deputación para participar en todas as manifestacións contra a política sanitaria da Xunta, será porque, ademais de irlle no soldo, ten que pagar algún tipo de favor”.

Na quenda de rogos e preguntas, o alcalde burelés afirmou que “o réxime de visitas do Barco Museo ten mudado para facelas previa solicitude e en grupos, co ánimo de manter o barco aberto pero adaptado á realidade económica que temos”. Barcia tamén afirmou que “dubidar dos datos feitos públicos relativos á ocupación hostaleira do verán é dubidar da capacidade dos propios hostaleiros de captar clientela”.